Dewa 2:7-18

⁷Ka taui yaui inovo kadu nuai vi‑tupatupa‑vaine, wayahina ivi‑vonavona, “Ia! Medeina idedewei? Tau vonaia habuhabui taina me Galili, ika?

⁸Kaiwadi, medeina taui ai pata habuhabuka movikaia ipuipupu?

⁹Itoka yaka papani vivane Paritia, ka Media, ka Elam, ka Mesopotamia, ka Iudea, ka Kapadosia, ka Ponitusi, ka Asia,

¹⁰ka Pirigia, ka Pampilia, ka Egipita, ka papani Libia papani Sirene awaniana, ka kadu tupwaka baina vivane tau bwanibwani meagai Rom wayahina, ka tupwaka dede Iudea tunuhina, ka kadu tupwaka dede tunina kate me Isiraeli yai tapanono kavi‑muniei,

¹¹ka kadu tupwaka me Kirete, ka tupwaka me Arabia. Kate habuhabuka movikaia tunina tunina kanonononi. Ka taui Yaubada ya dewa‑bagibagi wayahina ihaehaeyeka.”

¹²Wayahina, tomotaui nuai vi‑tupatupa, eha ta‑vidoha, kadue yai nuanua venau‑tamatamana. Ka matataui ivonavona, “Dewa taina anꞌ anamana medeina?”

¹³Ka mani tomotau tau hae‑naia ivi‑waipoei, ivona, “Taui daudau bagibagina inim‑iaua, ka avaha ivi‑kwavakwava.”

¹⁴Ka Pita yaiana ai yau 11 nui imimini, ka tauna movina ananina vi‑putu nau‑wahe yokoia wayahia, ivona, “Itomi me Iudea kadu Ierusalem a tau maꞌ habuhabumi, yau vona unononi, avo‑vi‑mahetemi.

¹⁵Itomi unuanua yama dewana vinꞌ‑omo daudau bagibagina wayahina, kate eha. Iuna ataina mana‑putu niwanina eha nim vi‑kwavakwava ana tuta.

¹⁶Kate nonova tau apa‑taputapu ana wava Ioela dewana mai‑haeyei. Ka ataina dewana vinꞌ‑omo Yaubada yana hae aitamoata deina.

¹⁷Iginumana ivona deina, ‘Yaubada ivona, “Apaina, tuta a pai nau‑yehata wayahina, yauke Nuau ana‑ito‑iwahi tomotau habuhabui wayahia. Ka natunatumi ononotoi kadu vaivinei inꞌ‑apa‑taputapu, ka yami tupunata ina‑ino‑dunedune, ka ononotoi ivi‑nainai yai ava inꞌ‑epei.

¹⁸Vona ahiahina, tuta tanoi wayahina Nuau ana‑ito‑iwahi yau tau paisewa ononotoi ka vaivinei wayahia, e taui wayahiu inꞌ‑apa‑taputapu.