Dehet deng Aan in Nutus sas 8:27-39

²⁷Ming in loka na kon, Filipus haung boka meman. Se un lalan in lako ka, un net atuli mesa. Atuling na, atuil tene deng negara Etiopia. Un man urus totoang ina laih Kandake hmuki-nalan nas. Un halas-sam muid in kohe-kanas se Yerusalem, ta un pait lako nini kereta. Filipus ngat netan nam un daad le les se kereta la dalen. Un les deng Ama Lamtua Allah mee-baah Yesaya buku la.

²⁹Kon nam Ama Lamtua Koo Niu ka lok Filipus, halin laok dadani nol kereta na, le tutnaal atuling na.

³⁰Nikit un lako dadani kon, un ming haup atuling na les deng upung Yesaya buku la. Kon un keket noan, “Ama! Ama taan asa man ama in les na, tam lo ka?”

³¹Kon atuling na siut noan, “Tanan lo! Atuli musti tui auk le, halas-sam auk tanan. Saek maa, le daad nol auk se nia.”

³²In dula man un in les mamasu na, lin na elia: “Oen pel-lakang Una, banansila el atuli in pel-lakang lae-blai, le laok lolat ta. Un kon tuladang el lae-blai ana man atuli ted Un bulu ka, mo mee tatahan lo ka. Un bok tahan baha ka lo, nol siut tahan dasi mes lo kon.

³³Hidim oen bilu-aa Una; Oen nutus Un dasi la nol in toma lo, molota, Un muik in kula-sala mes lo kon. Mo ela kon no, oen keo tele Una, undeng na le, kit bisa nahdeh deng Un in hua-koet tas pait lo.”

³⁴Les hidi ela kon atuling tene na keket Filipus noan, “Elola la? Upung Yesaya dehet ta tom nol un apa ka, tamlom tom nol atuil didang nga?”

³⁵Kon Filipus mulai dehet deng Yesaya in dula apin na, le tui blalan na deng Lamtua Yesus Dehet Dais Banan na.

³⁶Dedeng oen biis se lalan hlala kam, blalan na ngat net ui mes se lalan suut ta. Ta un naisiin Filipus in dehet ta, le nodan noan, “Ama, olan ku ngat le, ta muik ui mo nu nuan. Eta noan muik dola kam, maa le kit niu lako, halin ama sarain auk se ni tia.”

³⁷Filipus situn noan, “Eta meman ama parsai Lamtua Yesus baktetebes sam, muik in tukan-palan lo. Maa le kit niu laok le auk sarain ama tia.” Kon un hao noan, “Auk parsai baktetebes noan, Yesus na mo, Atuling man Ama Lamtua Allah tulu meman son deng lolo hmunan nua ka. Un na mo, Ama Lamtua Allah Ana.”

³⁸Kon blalan na lok atuling in kil kereta la ka, le tene. Hidim oen nius le tamas lakos se ui na dalen, kon nam Filipus sarain un se la.

³⁹Nikit oen duas putis deng ui la kon, Ama Lamtua Koo Niu ka kil lail-nini Filipus lako se maan didang. Ti atuling tene na ngat net Filipus pait lo son. Tiata un lako napiut, nol dael kolo.