14Petrus nol Lamtua Yesus aan in nutus at hngul esa kas se na. Kon Petrus keko lako el muka-mata lua, le un nikit in aa nol atuil hut mamo man in maa nakbua se na ngas. Un aa mumuun noan, “Ina-amang nol kaka-paling totoang! Mi man atuil Yahudi, nol mi man maa le daad se kota Yerusalem! Tidi mi hngilan nas le hii auk in aa nia, ta auk le tek mi totoang, mo mi musti nangan auk in aa ni babanan.
15Mi bali noan atuil nias mahus se? Loo! Nangan, ta taon elol le atuli niun mahu oskaong bii nia? Salolen le halas-sam diuk sipa!
16Mo mi ming atuil nias aa nini mi dasi-dehet mesa-mesa. In toma ka elia: dedeng na, Ama Lamtua Allah nini Un mee-baha mesa, ngala Yoel, le tek meman deng dais man noan:
17‘Ama Lamtua Allah tek noan, “Eta lelo-lelon nas mana le hidis sam, Auk le boho Auk Koo Niu ki lako se atuli las totoang. Se mi anan biklobe las, nol mi anan bihata las, le Auk taos daid Auk mee-baha. Mi anan muda kas, mam ngat net asa man Auk in le tulu-balang bel one ngas. Nol mi atuli-atuil blalan nas, mam natloa haup asa man Auk in le tulu-balang bel one ngas.