25Nikit kaim ming noan, muik atuli tao sus mi ela kon, kaim nakbua se nia, le nangan dais na. Hidim kaim kom leo-leo le nutus hidi dais na son. Tiata kaim huil nal atuil son, le tia tek mi deng asa man kaim in nutus son na. Oen tias leo-leo nol Barnabas duas Paulus, man kaim namnau.
26Ta kit atulin at dua nas, lepa-haal in susa-daat ta didiin naha-bubuit tam mates. Oen haup susa-daat ela, undeng oen in muid kit Lamtuan Yesus Kristus sa.
27Tiata kaim nutus Yudas nol Silas, le halin nam oen tek mi deng surat ni isin na.
28Ama Lamtua Koo Niu ka tek kaim son, nol kaim totoang tade ela son noan, mi tao muid kaim hadat Yahudi li totoang deken tia, banansila el hadat sunat ta. Ta hadat nas man tao ngele mi tuun. Mo muik dasi mesa-dua pait, man mi musti nangan babanan:
29Laok kula nol bihata tamlom bikloeb man ku sapam lo ka deken. Kaa siis in hui-langus deken. Kaa daal deken. Nol kaa hmukit man atuli kes tele ka sisin na deken. Eta mi doha-tiud apan deng dais nas totoang ela lam, mi pail-kakan atuil Yahudi man Kristen nas nikis mi lo. Nol ela lam, mi bisa nakbuan nol one. Kaim surat ta lin na ela tuun. Boa-blingin.”
30Oen sium nal surat na kon, Paulus nol un tapan nas seon le oen lakos napiut se kota Antiokias. Lakos lius se luas kon, oen haman nakbua atuil sarani las totoang, le beles surat na.
Dehet deng Aan in Nutus sas 15
Dehet deng Aan in Nutus sas 15:25-30