De Postle Dem 19:1-11

¹Wiles Apollos been dey een Corinth, Paul beena trabel roun shru de middle ob de arie til e git ta Ephesus. Wen e git dey, e find some wa bleebe an waak een de way ob de Lawd.

²Paul aks um say, “Wen oona fus bleebe pon Jedus, de Holy Sperit come pon oona same time?” De bleeba dem ansa Paul say, “No. We ain neba eben yeh bout no Holy Sperit.”

³Paul aks um say, “Wa oona bleebe een den wen dey bactize oona?” Dey ansa Paul say, “We bleebe wa John been say bout wa e mean fa git bactize.”

⁴An Paul say, “Wen John beena bactize people, e tell um e bactize um fa show dat dey done change dey sinful way an ain gwine do um no mo. John tell um say, ‘Mus bleebe pon de one dat gwine come atta A gone.’ Dat de Lawd Jedus dat John beena taak bout.”

⁵Wen de bleeba dem yeh wa Paul say, dey git bactize een de name ob de Lawd Jedus.

⁶Paul lay e han pon dey head an de Holy Sperit come pon um. Dey staat fa taak dem language dat dey ain neba laan, an dey taak God message.

⁷All togeda dey been bout tweb man wa git bactize.

⁸Paul been dey een Ephesus fa shree mont, an all dat time e beena go eenta de Jew meetin house fa taak ta de people dey. E ain been scaid one bit. E been try fa bring um fa bleebe een de Lawd. E done dat, da tell um pint by pint bout how God rule.

⁹Bot some dem people been haad head. Dey ain been wahn fa bleebe pon Jedus. An out een de open, een front ob ebrybody, dey shrow slam bout de Way ob de Lawd. So Paul lef um an gone. E tek de Christian bleeba dem wid um. An Paul gone ebry day ta Tyrannus place weh people come togeda fa taak bout diffunt ting.

¹⁰Paul keep on fa two yeah dey. Cause ob dat, all de people een de arie ob Asia, de Jew people an de people dat ain been Jew, all dem yeh God wod.

¹¹God nyuse Paul fa do powaful miracle wok.