De Postle Dem 10:1-16

¹One man been dey een Caesarea name Cornelius. E been a offisa fa de group ob sodja dem fom Rome wa de people call De Italy Sodja Dem.

²Cornelius an all e fambly beena woshup an feah God. E been gii heapa good ting fa hep dem wa ain hab nottin, an e beena pray ta God all de time.

³One day bout shree o’clock, God show Cornelius one wision, too plain. E see God angel come een an tell um say, “Cornelius!”

⁴Cornelius been scaid fa true, an e look haad pon de angel an say, “Wa ya wahn, Lawd?” De angel tell um say, “God done yeh de pray wa ya beena pray. E see de good ting dem ya da gii ta dem wa ain hab nottin. E heppy wid wa ya da do, an e da ansa ya.

⁵Sen some man dem now ta Joppa fa bring back one man dey name Simon, wa dey call Peter.

⁶E da stay dey wid noda man name Simon, wa da wok wid lezza. E da lib een a house close ta de seasho.”

⁷Den God angel dat beena taak ta Cornelius gone way. Cornelius call two ob e house saabant dem an one sodja wa been e right han man an woshup God.

⁸Cornelius tell um all wa happen an e sen um ta Joppa.

⁹Bout noon de nex day, wiles dem man beena gwine long de road an dey beena git close ta Joppa, Simon Peter gone pontop de flat roof ob de house weh e beena stay, fa pray.

¹⁰Peter been hongry an e been wahn sompin fa nyam. Wiles de people een de house beena fix some food, God show Peter one wision.

¹¹E see heaben open op. Sompin dat look like a big bed sheet beena come down. Dat sheet beena leddown fom heaben by e fo cona til e git ta de groun.

¹²All kinda critta, animal an reptile wa crawl pon de groun an wile bod, been dey pon de bed sheet.

¹³Peter yeh a boice da tell um say, “Peter, git op. Kill some dem an nyam um!”

¹⁴Bot Peter say, “No, Lawd! A ain neba gwine nyam nottin dat we Jew Law say ain fit fa nyam.”

¹⁵De boice tell Peter gin say, “Wasoneba God done mek good fa nyam, ya mus dohn say e ain fit fa nyam.”

¹⁶Dat happen shree time an den all ob a sudden dat ting like a bed sheet gone back op eenta heaben.