Dagiti Proverbio 23:18-35

¹⁸Awan duadua nga adda masakbayan ket saanto a mapukaw ti namnamam.

¹⁹Dumngegka, anakko, ket agbalinka a masirib ken agbiagka iti umno a wagas.

²⁰Saanka a makikadua kadagiti mammartek, wenno kadagiti narawet a mangan iti karne,

²¹ta pumanglawto dagiti mammartek ken narawet, ket agkawesdanto iti rutay rutay.

²²Dengggem ti amam a nangiputot kenka ken saanmo a laisen ti inam inton bumaket isuna.

²³Arigna a gatangem ti kinapudno, ngem saanmo nga ilaklako; arigna a gatangem ti kinasirib, panangisuro ken pannakaawat.

²⁴Agrag-o iti kasta unay ti ama ti tao nga agar-aramid iti nalinteg, ken agragsak met ti makin-anak iti maysa a masirib nga anak.

²⁵Maragsakan koma da amam ken inam ken agrag-o koma ti nangisikog kenka.

²⁶Anakko, itedmo kaniak ta pusom, ket paliiwen koma dagita matam dagiti wagasko.

²⁷Ta ti maysa a balangkantis ket maiyarig iti nauneg nga abut, ken maiyarig met iti akikid nga abut ti asawa ti sabali pay a lalaki.

²⁸Aglemlemmeng isuna nga agur-uray a kas iti agtatakaw, ken papaaddoenna ti bilang dagiti nagulib iti sangkataoan.

²⁹Siasino aya ti kakaasi? Siasino aya ti agladladingit? Siasino aya ti makirangranget? Siasino aya ti agrekreklamo? Siasino aya ti nasugatan nga awan gapgapuna? Siasino aya ti limmablabbaga ti matana?

³⁰Dagidiay naigamer iti arak, dagidiay agin-inom iti naglalaok nga arak.

³¹Saanmo a kitkitaen ti arak no nalabaga daytoy, no rumimat-rimat ti uneg ti kopa ken mayat ti panagaruyotna.

³²Iti udina, kumagat a kasla karasaen ken kumagat a kasla nagita nga uleg.

³³Makakitanto dagiti matam kadagiti karkarna a banbanag, ket agisawangto ta pusom kadagiti saan nga um-umno a banbanag.

³⁴Agbalinkanto a maysa kadagiti matmaturog kadagiti nangangato a taaw wenno agid-idda kadagiti tali ken kawar ti barko.

³⁵“Kinabildak!” kunamto, “ngem saanak a nasaktan. Pinang-ordak, ngem diak narikna. Kaanoakto a makariing? Mangbirukak pay iti sabali a mainum.”