Dad Nimò 10:2-21

²Kornilyu na i familyan, toola nafè i Dwata, na nun klikòla dun. Na too bong tabengan di dad Dyu landè knun, na too kenen fduf dmasal.

³Na di satu du, kanto tngà masol i du, nun kanteenan satu kasaligan i Dwata fdadong di kenen, manan, “E Kornilyu.”

⁴Na too neye Kornilyu i kasaligan ayé magin i klikòan, na snalekan kenen, manan, “Détan kè, Sér?” Na tmimel i kasaligan, manan, “Too lehew Dwata gablà di dad dasalam, na i dad blém di dad to landè knun, na yé duenam man, toon ge fandam.

⁵Na ani, mdek ge dad lagi salu ditù di Dyopa du nngéla satu lagi dnagit Simon Piter.

⁶Yé gufanakan di kilil mahin di lam gumnè Simon, dunan i to tambél kulit lmanaf.”

⁷Na kanto mdà i kasaligan ayé, ta tlo Kornilyu i satu sundalun mafè i Dwata, na lê man lwe fasakan.

⁸Na tulenan dale i kdee ta mkel, klon mdek dale salu ditù di Dyopa.

⁹Di tmadol du, kanto fan ltu du, ta mdadong ale di Dyopa. Na Piter, myak kenen di tah ataf i gumnè du dmasal.

¹⁰Na ta too kenen bitil, na mayè kmaan. Na di lamla mimò i knaan, nun kanteenan.

¹¹Yé teenan ta mgukà i langit, na nun gambet bong kayab nikat di sbalà syungan fayol kel di tanà.

¹²Na nun dad sahal lmanaf, na dad kmamang, na dad anuk di bnas mnè di laman.

¹³Na nun lingen talù di kenen, manan, “Piter, tadag ge. Tmatê ge, na knaanam.”

¹⁴Bay tmimel Piter, manan, “E Amu, là fakayan. Là ti lmen-gu do kmaan i dad magsik gambet ayé, ku demen i là fakaymi dnawat.”

¹⁵Na ta lêan linge i talù ayé, manan di kenen, “Nangam man ku magsik i ta lnaneb Dwata.”

¹⁶Tlu dulêan mkel di ku Piter, na kafnge ayé, ta lê magket i kayab ditù di langit.

¹⁷Na di lam Piter famdam ku dét gumtatek i kanteenan, ta kel déé di Dyopa i dad lagi dek Kornilyu, na snalekla gusablà i gumnè Simon, klola fles di bà labat i gumnè gufanakan.

¹⁸Na tamlo ale, na snalekla ku déé gufanak Simon Piter.

¹⁹Na di lam Piter famdam i kanteenan, ta talù i Mtiu Tulus di kenen, manan, “Nun tlu lagi mngabal ge.

²⁰Taman, tadag ge, na tufa. Na nangam falwe nawam magin dale du do mdek dale.”

²¹Na ta tufa Piter, na manan dale, “Do sa i fanngabalyu. Dét i fandufyu dini?”