16Masasulit ani kel di tlu dulê, na kafnge én, magket i kayab samfulê ditù di langit.
17Na sleng Fiter faldam ku tan i gumtatek i kanteenan, takel i dad to dek Kornilyus na snalekla i gusablà gumnè Simon, na fles ale di bà labat i gumnean.
18Na tamlo ale na snalekla ku déén Simon Fiter.
19Na klo fa Fiter faldam i gumtatek i kanteenan man Tulus Dwata di kenen, “E Simon, nun tlu lagi mngabal ge.
20Taman mték ge na tufa. Na nang lwe nawam magin dale, du tadekgu ale salu dini.”