Dad Fngewe 5:11-23

¹¹Na di fan kafto i nawayu kadang, mlanu gamu mdà di kalmo ilawehyu.

¹²Na msal gamu kadang manyu, “Fye moon di munafa, ku fanlingegu i tdò deg, na ku fanlingegu moon i kngak deg.

¹³Di muna, là agu mayè flinge i dad tamdò deg, tatìgu bayà i tdòla deg.

¹⁴Na ani gukelgu, nun sasè kyàgu di mata i dee dadto.” Ani manyu kadang.

¹⁵Kaflingengu dun, ku fkahta di kinum, én guminumyu di gamuguminum, én alòyu too kanbong nawa i gamu yaan.

¹⁶Landè gufyeyu di dad ngàyu di dademe libun ise yaanyu.

¹⁷I dad ngàyu lamnok sa moon di ifatyu, na gamtabeng ale gamu, ise baling ku di dademe to gutmabengla.

¹⁸Taman flehew gamu di glut yaanyu, du too nun klehewyu di dale.

¹⁹Flehew gamu di kafye bawehla, na mdà di kakdola gamu na di kafye nimòla di gamu, i gamlé gamu klehew.

²⁰Taman dad ngàgu, kan ku kandoyu i satu libun ise yaanyu? Na kan ku dnawatyu i kakdo mdà di libun yaan i dademe?

²¹Du teen Dwata i kdee nimòyu, na balù nè i gusaluyu, teenan gamu.

²²I dad salà i to sasè mbaling fawel, du i dad salaan, mawel kenen.

²³Mati kenen du laan gagan damnan i kton, na du laan fulung faldam, én mebe kenen di fati.