Dad Fngewe 4:4-12

⁴màgu tamdò deg, na galan man di deg manan, “Toom fkah di nawam i mangu ge, na laloam i tdògu ge, du ku ani nimoam mlawil ge.

⁵Too ge mngabal kfulung na kaglabat, na nangam nlifet ku demen fbayà i mangu di ge.

⁶Toom fkah di nawam i kfulung du én kamlung ge, na knabasam du én mifat ge.

⁷Too ge mngabal i kfulung, du ani mabtas di kdee, na mngabal ge fa kaglabat, balù tan i btasan.

⁸Ku knabasam i kfulung mbaling ge mdatah, na ku busekam di nawam too ge mgafè.

⁹Na too ge dnilè i dad to ge i to nunkfulung.” Ani gman màgu di deg.

¹⁰Tingàgu, flinge ge di deg na dnawatam i mangu di ge, du fye too ge mlawil.

¹¹Tagatdògu di ge i kfulung, na agu malak ge di matlu dalan.

¹²Na di kagum landè gablabal di dalanam, na di kilam là ge tlaab.