Dad Fngewe 31:3-20

³Nangam sa falmo i kgalam na filakam di dad libun, du én gafalmo ge, na balù dad harì tagafalmola.

⁴Fanlingem agu Lémwél, là gablà di dad harì, ku demen dad dademe ulu ku too ale mayè minum i dad gamlangal,

⁵du ken di kinumla glifetla i dad flalò, na là ale kadang mimò i matlu nimò di dad to nun klidù.

⁶Kabay fakay finumam tukay di dad to tafan mati, demen i dad to too msamuk i nawala di klidùla,

⁷du fye glifetla i klandèla na i klidùla.

⁸Nsenam i dad to landè kibò msen i ktola, na tnabengam i dad to landè kibò tmabeng i ktola.

⁹Nsenam i dad to landè na tanlum i kukumam dale na tnabengam i dad to landè na i dad to too nun klidù.” Ani gman i yê Harì Lémwél di kenen.

¹⁰Malima mite libun nun yaan too fye ldam, na bay ku nun teenam, mabtas fa kenen di too mabtas kas.

¹¹I yaanan too smalig di kenen, na landè gukulangan.

¹²Klo i libun ani mnè di tah tanà, too fye kiboan yaanan, na landè sasè nimoan di kenen.

¹³Too malgad kenen mimò klaweh mdà di bul bilibili.

¹⁴Gal matun kakaanan di gumawag banwe, na neben di gumnean, salngad nimò i kafal gal mebe kakaan mdà di gumawag banwe.

¹⁵Di là fa mwal mték kenen du nimoan knaan i malayan, na dekan dad saligan libun mimò dademe nimò.

¹⁶Salu kenen di satu tanà du neyen, na bnayadan, na fagu di filak gwean mdà di nimoan, bayadan bnê du fanlan i tanàén.

¹⁷Too mayè kenen mimò na too malgad, na nun kgalan di dad nimoan.

¹⁸Gadean i kabtas kdee nimoan, na balù kifu mimò kenen.

¹⁹Mimò kenen sinulib na mabal klawehla.

²⁰Too kenen mayè mlé di dad to landè na di dad to nun klidù.