Dad Fngewe 31:10-29

¹⁰Malima mite libun nun yaan too fye ldam, na bay ku nun teenam, mabtas fa kenen di too mabtas kas.

¹¹I yaanan too smalig di kenen, na landè gukulangan.

¹²Klo i libun ani mnè di tah tanà, too fye kiboan yaanan, na landè sasè nimoan di kenen.

¹³Too malgad kenen mimò klaweh mdà di bul bilibili.

¹⁴Gal matun kakaanan di gumawag banwe, na neben di gumnean, salngad nimò i kafal gal mebe kakaan mdà di gumawag banwe.

¹⁵Di là fa mwal mték kenen du nimoan knaan i malayan, na dekan dad saligan libun mimò dademe nimò.

¹⁶Salu kenen di satu tanà du neyen, na bnayadan, na fagu di filak gwean mdà di nimoan, bayadan bnê du fanlan i tanàén.

¹⁷Too mayè kenen mimò na too malgad, na nun kgalan di dad nimoan.

¹⁸Gadean i kabtas kdee nimoan, na balù kifu mimò kenen.

¹⁹Mimò kenen sinulib na mabal klawehla.

²⁰Too kenen mayè mlé di dad to landè na di dad to nun klidù.

²¹Kel i bang katno, landè klikoan, du tanun klawehla fatlagadan.

²²Nimoan dad kayabla, na too fye bung klawehan na too fye baweh i batakan.

²³I yaanan too mdengeg, du kenen satu ulu di banwela.

²⁴I fye libun ani, gal mimò i klaweh na fablin, na mimò dad galing, du fablin di dad to gal fabli.

²⁵Too kenen mgal, na too mgafè, na landè klikoan balù tan kel di dale.

²⁶Ku talù kenen dileam i kfulungan, na too glut i katdoan.

²⁷Too kenen mimò, na toon nifat malayan di dad klidùla.

²⁸Too mabtas kenen di dad ngaan, na dnayen kenen i yaanan.

²⁹Man i yaanan, manan, “Nun dee dad libunfye, bay ge too mdatah di kdee.”