Dad Fngewe 30:9-33

⁹du ku bong lukas i blém deg, ken mangu landè gukmamugu ge, demen ku landè agu, ken tmaku agu na gafalmogu dengeg Dwatagu.

¹⁰Nangam tulen di satu amu i kdalamam i satu saligan, du ku ani nimoam, fanlagin ge, na ge baling maflayam.

¹¹Nun dad to mlagi i màla, na là mlé kafye di yêla.

¹²Nun dad to flingu too ale mlaneb bay i kaglutan, di lam i nawala too ale magagsik.

¹³Nun dad to fandamla too ale mdatah, na taman toola fdatah i ktola.

¹⁴Nun dad to too ale mkut i dad to landè, na kdee sasè nimò nimòla di dad to landè, du fye gwèla i knunla.

¹⁵Nun satu to too lom, na nun lwe ngaan libun, na galla man, “Banlém gami,” bay balù tan i blém, là gabsol dale, taman salngad ale di fat ani,

¹⁶dunan banwe i dad mati, i libun là fakay mngà, i tanà là alì nulen, na lifoh fadlug smakuf na là fakay fnati.

¹⁷I to madoy i maan, na too là mayè mimen i yéan, fye ku tnukè i dad anuk di bnas i dad matan, na i lawehan knaan i dad kablak.

¹⁸Nun tlu tnikenggu, nun fat i làgu glabat,

¹⁹kibò i kablak mayeng di langit, kibò i ulad fulu di tah i batu, kibò i kafal magu di talà mahin, na kibò i lagi kamdo i libun.

²⁰Ani nimò i libun mlafà yaanan, di fandaman landè sasè nimoan, taman, manan, “Landè sa sasènimògu.”

²¹Nun tlu too sasè di fandam i dad to di tanà ani, nun fat i knangla,

²²i salig mbaling harì, i to là fulung faldam, i tanun kdee knayean knaan,

²³i libun sasè ldam na landè kamdo kenen, bay gamwè yaan, na i libun alò salig mbaling amu di gumnè i amun.

²⁴Nun fat too malnak dini di tah tanà, bay knean too ale fulung,

²⁵i dad mamang balù too ale mlungay, knean santifunla i knaanla di bang nun gumwèla, du fatlagadlaknaanla di bang i klandèla,

²⁶i satu bung lmanaf dnagit kuni, too ale mlungay, knean gmagan ale mimò i gumnèla di gunun batu,

²⁷i dad tlangas, balù landè malak dale, knean stadol ale mayeng,

²⁸na i dad tikì balù fakay kanfè i kmalam, knean mnè ale di gumnè i dad harì.

²⁹Nun tlu fye neye i kagula, du fulung ale magu, nun fat kadì,

³⁰kagu i liyun labè di kdee lmanaf, na landè klikoan,

³¹kagu i masel smagégél i tinefen, kagu i lagi kambing fdadong di libun kambing, na kagu i harì di muna i dad sundalun.

³²Ku lmenam fdatah, du là ge fulung faldam, demen tafandamam i kiboam mimò sasè, tanlagam ani na fandamam i gukel i dad nimò gambet ani.

³³Ku mlo kanligongam gatas msut i tabè, na i ilung, ku snuntukam mlitè, salngad i klabè, ku ninitam mbaling nun samuk.