Dad Fngewe 25:4-26

⁴Funa fwè i gbol di salafì, klon fa mlé dun di to msel, du fye nun gimoan i fye baweh.

⁵Na salngad én, funa falwà di muna i harì i dad to sasèkafngewela, du fye i kagotan mbaling matlu.

⁶Ku déén ge di muna i harì, nangam fdatah i ktom, na nang ge sudeng di gusudeng i mdatah to,

⁷du fye fa ku manan di ge, “Dini ge di too fyegusudeng,” di kafyaan ge fagu di kmanan, “Blém igusudengam di mdatah to ani.”

⁸Nang ge flal tmulen di gususay, balù nun teenam, du ken là glut, du ken nun dademe to tmulen na là salngad i ktulenyu, du ku là salngad, landè kiboam ku fyàla ge.

⁹Ku nun demem to na nun là gusalngad i nawayu, stulen gamu alògamu lwe, na nangam tulen di dademe to i dad santulenyu i là fakay tulen didale,

¹⁰du ku gmadè i dademe to, talandè ksaligla ge, na baling ge myà, na sasè dengegam kel di atuan, du tmulen ge i là fakay moon gadè idademe to.

¹¹Too fye fanlinge i talù too mastadè, salngad kafye i kafye falas di gumnè i harì.

¹²I fngewe i to fulung faldam di to too fulung flinge, too mabtas fa di kas mgimò mdà di too glut blawen.

¹³I to dek tmulen too gsalig, gafye nawa i to mdek kenen, salngad kafye nawa i to nun too tno yéél di kinit i duh di bangkaktu.

¹⁴I to makang nun blén, bay laan gafles blé dun salngad too mlabun na too mnus, bay là gafles mulen.

¹⁵I to fganag i taluan na ftahaan i nawan, gamguman nawa dad gumdatah i mgal ulu.

¹⁶Ku minum ge tnab, nang flukas, du ken utaam.

¹⁷Nang ge alì tlang di gumnè i demem to, du ken glukas na knangan ge.

¹⁸I to tmulen kéng gablà di demen to di gususay gamfati salngad i bunal, sundang, na i sait gamban du gamfati.

¹⁹Én ksasè i to smalig di to là gsalig di bang nun ksamuk, salngad ksasè i kifan maglifò na i satu blì là gmagan du slamelandè gukmamu.

²⁰I to flehew mlingag di bang nun klidù nawa i demen to, salngad ku maglus i klaweh di bang katno demen ku nkah kahì i seey, du slame là fakay du mgutes i ksasean.

²¹Ku bitil i to dmuen gamu fankaanyu kenen, ku malinum banléyu kenen ninum,

²²du ku ani nimoam, mbaling kenen too myà mdà di kafsasean gamu, na gdawatyu untung mdà di Dwata.

²³Ku bang i balat too gafles mulen salngad kagafles i kalbut ku nun malsalék.

²⁴Fye fa ku i lagi nun yaan mnè di too tukay lawig di satnù di gumnè i yaanan mayè mugak.

²⁵I fye tulen mdà di gumawag banwe too fye di nawam salngad i kafye nawa i to malinum di kinuman i yéél tno.

²⁶Too makakdo i to matlu ku naginan i to sasè, salngad i to gal magu ku kel di sfuten na di gal gusmulu na slamemalbal.