Dad Fngewe 24:2-30

²du gal ale faldam i kibòla smamuk, na galla sanman gablà di kimòla sasè di demela to.

³Fagu di kfulung i satu to gafdakan i gumnè, na fagu di kaglabatan nun kgal i gumnean,

⁴na du nun gnadean, nun mabtas na nun fye baweh kandeenan di dad sibayan.

⁵Fye fa i to fulung faldam di to too mgal, du too mdatah fa i gnagan i to nun gnadè di to nun kgal,

⁶du ku fan ge salu di gusfati, mni ge funa i fye fngewe, na fagu di fye kafngewe i dee mebe, na matu ge sa di kasfati.

⁷I mngalam talù i to fulung faldam là glabat i to là fulungfaldam, taman ku nun kastulen too mngalam, landè timelan du laan glabat.

⁸I to funan fandam i kiboan mimò sasè, én kdagit kenen i to mimò samuk.

⁹I ksamuk i gal fandam i to là fulung faldam, salà sa, na knang dad to i to gal madoy.

¹⁰Ku mlungay i nawam di nun samuk, too glut mlungay ge.

¹¹Faflalam falwà i to landè gugsalaan, i fan fnati i dademe.

¹²Kabay ku balingam man, “Landè gadègu, nalandè labetgu di to atù,” bay gmadè Dwata ku tan i mnè di nawam, du kenen too meye ge, taman gadean i kdee, taman bnalasan ge di kdee dad nimoam.

¹³Tingàgu, minum ge tnab, du too fye neman, na tnab mdà di dalit i sugen too mi.

¹⁴Na too fye nem i tnab di baam, salngad i kafye i kfulung dinawam, taman toom fkah di nawam kfulung, du nun kadang gufyem di satu duh, na gdohò i kafye i galam fatan.

¹⁵Nang ge meye i kfagum mlayam i to matlu, salngad i nimò i tosasè du tmaku, na nangam falmo i gumnean,

¹⁶du balù file dulê fnugen i to matlu lêman gték, bay i to sasè, di kakel i too sasè kalima, laan gték.

¹⁷Nang ge lehew ku nun sasè kel di to dmuen ge, na nang flehew i nawam di kfugenan,

¹⁸du ku ani nimoam gadè sa Dwata na laan mayè dun, na ken laan baling fanlayam i to dmuen ge.

¹⁹Nangam fsamuk i nawam gablà di dad to sasè, demen nang mibal nawam i kagkahla,

²⁰du dad to sasè landè fatanla, na landè gufyela di satu duh.

²¹Tingàgu, fye ku nun klikoam di Dwata na i harì, na nang ge magin i dad to là mimen dale,

²²du dad to gambet ani nun kalmola tatì makto kel, du landè gmadè ku tan i flayam blé Dwata na i harì di dale.

²³Ani i dad dademe gman i dad to fulung faldam: Là fye ku i to gal mukum nun nsenan di dad to nukuman.

²⁴Du i to mukum, ku di kukuman i to gamsalà na manan landè salaan, fanlagi kenen i dad to na kdee dad to mnang nawala kenen.

²⁵Kabay i to mukum, ku nukuman i to gamsalà na faflayaman i toani, nun gufyen na dnayen kenen i dad to.

²⁶I to tmimel i too glut timel, én ilè i to ani too fye deme sgalak.

²⁷Funam fatlagad i nligom, du fye gadeam nun gumweam, kafnge én fdakam gumneam.

²⁸Nang ge tmulen gablà di demem to di gususay ku landè duenan, na nang ge tmulen ise glut gablà di kenen.

²⁹Na nangam man, “E, malas agu i sasè nimoan dideg.”

³⁰Glius agu di satu nligo nfun i to malwe mimò na là fulung faldam.