7Balù dad flanek i to landè là fduf kenen, labi fa kfawag i dad demen sgalak di kenen. Na balù toon fangal fakdo di dale, là ale fdadong di kenen.
8I satu to ku fulung faldam magtabengan i kton, na ku toon fkah di nawan i kaglabatan nun gufyen.
9Ku là glut i ktulen i to tmulen di gususay, fanlayam kenen, na malmo i to tmulen kéng.
10I kafye knè là blà i to là fulung faldam, na i to salig, là gablà ku kenen mdek i amun.
11I to fulung faldam gadnanan i klabean, na ku nun gamsalà di kenen, ku tatian fbayà, na dnayen kenen i dadto.
12I kaflabè i harì gaflikò salngad i bong ngal i lmanaf liyun, bay i kakdon too fye salngad i ulen tatì sanfatan.
13I tingà là fulung faldam, gafalmo i maan, na i libun too mugak i yaanan too sasè fanlinge, salngad uni yééllà tlag tamdak.
14I to gamfun i gumnè na filak mdà di dad tuan, bay alò Dwata i gmagan mlé kenen i yaan fulung mebe i kton.
15I to malwe mimò tatì fadlug kudang, na i gukelan bitil.
16I to mimen dad flalò Dwata, mlawil kenen, bay i to mnang i flaloan, mati kenen.
17I to kamdo i to landè, salngad ku mlé kenen di Dwata, na Dwata malas kenen.
18Fanlayamam i tingaam di gugsalaan di muhad fa i nawan diklom fa fakay tamdò kenen, du ku laam nimò ani, baling ge sa tmabeng kenen falmo ikton.
19Én nimoam di to mlal malbut tatiam fbayà, fye kenen tmimelku tan i gukelan, du ku tnabengam kenen sulê, kamnalam kenen na là ge tlagtmabeng kenen.
20Flinge ge i fngewe na dnawatam i tdò ge, du fye kadang ge mbaling to fulung faldam.
21Nun dee fala fandam i to ku tan i fanan nimò, bay knayè Dwata, én gdohò.
22Kayè i to ku nun kamdo kenen landè gusenan, na fye fa i to ku landè knunan, di to tmulen kakakéng.
23I to nun klikoan di Dwata mlawil kenen, na nun ktanak nawan, na gawag kenen di ksasè.