Dad Fngewe 18:5-22

⁵Là sa fye ku i to gal mukum msen di to nun salà, na là fakay ku laan banlé kagalwà i to landè salà.

⁶I talù i to là fulung faldam, én gutambù i ksugak, na tatian mimò i tdukan.

⁷I gafalmo i to là fulung faldam, dunan i dad galan gman, na mfawel sa mdà di kenen dad talù.

⁸I kastugad salék too kanbayan fanlinge i dad to, di dale salngad knaan too fye i neman na too fye nawala mlo dun.

⁹I to malwe mimò, salngad ksasè i to gal falmo.

¹⁰Dwata salngad i bong mgal gumnè i gal gumila i dad to matlu, du fye giwas ale di sasè.

¹¹I dad to nun knun, fandamla i knunla kamlung dale, salngad kaklung i bong mdatah labat batu glibut i syudad.

¹²I to fdatah, falmon i kton, bay i to fdanaan i kton, too mgafè.

¹³I to là funa flinge klon tmimel, kenen i to là fulung faldam na nimoan i gumyaan.

¹⁴I to fangalan i nawan di bang i nun fdasan, ani i dalanantmabeng i kton, du fye mto, bay i to flungay i nawan di nun fdasan, landè imen nawan ku mto fakenen.

¹⁵I to nun kaglabat too mayè ku matnù i gnadean, na i to fulung faldam too flinge, du fye matnù i gnadean.

¹⁶Ku mayè ge smite i satu bong to, mebe ge i blém kenen, fye mlal site.

¹⁷I to muna talù di usay, fnaglutam glut i gmanan di là fa snalek i to demen susay.

¹⁸Ku nun lwe mdatah to i masbalà di usay, na malima musay, fakay sulat i dagitla na kanligong, na simto dagit i muna lamwà, kenen mgalék i nun kaglut, na anigmagan musay dale.

¹⁹I flanekam tafatdukam i nawan, too malima samfulê di fye i nawange, na ku nugakam fa, én too gablabal di kasafyeyu.

²⁰Ku tan gukel i kdee man i satu to, alò kenen sa tmimel dun.

²¹I dad gman i satu to, én gafalwà i kton ku demen gafalmo i kton, taman là fakay ku laan tnimel ku tan gukel i dad manan.

²²I lagi ku tamite i fye yaan, teenan i kafye, du i kafye teenan tablé Dwata di kenen.