Dad Fngewe 16:8-27

⁸Fye fa ku tukay knunam, syan fagu di matlu i kagweam dun, di bong knunam, bay gweam fagu di klimbung.

⁹I to fakay faldam ku tan i fanan nimò, bay Dwata alò fakay malak kenen di kimoan dun.

¹⁰I glal i harì mdà di Dwata, taman i kukuman mbaling matlu.

¹¹Ani kayè Dwata di dad to fabli, ku là mlimbung i timbangla, na too matlu i kafablila.

¹²Knang i dad harì i sasè nimò, du én gutadag i kagotla i matlu nimò.

¹³I dad harì mayè ale flinge i kaglut, na knabasla i to tmulen i kaglut.

¹⁴I to fulung faldam, too fgal flehew i harì, du ku malbut i harì ken nun fafatin.

¹⁵Kabay ku lehew i harì, mlé kenen i kafye di dad to gaflehewkenen, salngad i ulen mlé fye di dad fule.

¹⁶Fye fa ku nun kfulungam faldam di nun blawenam, na fye fa ku nun kaglabatam di nun salafiam.

¹⁷I to fye mlalò i dalan mawag di ksasè, na i to too fgeye ku tanè i gusalun, landè gaslokan.

¹⁸I bunge i kafdatah na kafdag dunan kalmo.

¹⁹Fye fa i to ku fdanaan i nawan na fadlug di klandean, di gakuf kenen di dad to fdatah na nun alelan di dad tnakula.

²⁰I to too flinge i tdò kenen, nun gufyen, na nun kafye di to too smalig di Dwata.

²¹I to fulung faldam dnagit to nun kaglabat, na i kafye taluan, én gmagan mebe i dad to.

²²I kfulung i to fulung faldam, én gafye na gatgal i nawan, bay i to là fulung faldam, landè gukmamu i katdò kenen.

²³I to fulung faldam, too funa faldam di laan fa talù, taman i taluan too fnaglut i demen to.

²⁴I fye talù, salngad i tnab too mi i neman, na gafye i laweh.

²⁵Nun dalan fandam i to too matlu, bay i gusen i dalan ani di fati.

²⁶I to mimò mdà di kbitilan too fgal mimò, du kayean gamkaan.

²⁷I to sasè i landè gukmamu, galan neye i dalan kiboan fsasè idemen to, na i taluan too gafalmo, gambet i lifoh.