Dad Fngewe 15:19-31

¹⁹I to là mayè mimò, balù tanè, nun dad sual gablabal i dalanan, bay i to matlu landè gablabal i dalanan.

²⁰I tingà fulung faldam gaflehew i maan, bay i tingà là fulung faldam knangan i yéan.

²¹I to landè kaglabatan toon sa kanlehew i sasè nimoan, bay i to nun kaglabatan, toon nimò i matlu nimò.

²²I tafandam i to là gdohò ku kulang i dad to mngewe, bay too gdohò fagu di dee dad to mngewe kenen.

²³Lehew i to ku fye i ktimelan di bangan tmimel dun.

²⁴I to fulung faldam, mlalò i dalan salu di nawa landè sen, là mlalò i dalan salu di fati.

²⁵Lanbà Dwata i gumnè i to fdatah, bay nifatan i tanà i libun balu.

²⁶Knang Dwata i fandam i dad to sasè, bay kanlehewan i talù dad to mlaneb i nawala.

²⁷I to mlimbung fakufan sa i malayan di ksamuk, bay i to là dmawat i blé du fye msen di sasè, mlawil kenen.

²⁸I to matlu funan too faldam di laan fa tmimel, bay i to sasè mlal timelan, bay sasè i manan.

²⁹I dasal i to matlu too fanlinge Dwata, bay mawag Dwata di to sasè.

³⁰Ku lehew i satu to, ge baling too lehew, na i fye tulen too gafgulê ge.

³¹Ku flinge i satu to i kngak kenen, mbaling kenen satu di dad to fulung faldam.