Cantares 7:5-13

⁵Umayquipis cuerpuyquichöga caycan Carmelo puntano cuyayllapämi. Ajchayquicunapis cuyayllapaj achic-achicyaycan. ¿Ajchayquiwanga rayta imanaycushcanquitaj pasaypa cuyacurcushunayquipäga?

⁶Cuyaynë, gamga canqui fiyupa cuyayllapämi. Mana cachaypa cuyacuypaj, fiyupa cuyayllapämi canqui.

⁷Palma yöra ichiraycajno cuyayllapämi canqui. Chuchuyquicunanami chay yörapa wayuynin warcurpaycajno.

⁸Nogaga palma yöramanmi wichayta yarpaycä, wayuynin warcuraycajcunata duyñu-tucurcunäpaj. Chaura chuchuyquicunaga cangapaj sartanpa-sartanpa übas wayuraycajnömi. Jämayniquinami mansänano asyanga.

⁹Parlacuyniquega mishquej alli bïnunömi. Chayga caycan mishquej bïnu shimi-wirpanchïpa, quirunchïpa mishquilla chayar päsarejnömi.

¹⁰Nogaga cuyaynëpami cä. Paypis nogawan iwal caytami munan.

¹¹Cuyaynë, juclla aywashun jircaman. Cuyayllapaj asyaj waytacunapa chaupincho warämushun.

¹²Tutapanami tumapacoj aywashun übas chacracunapa. Chaychömi ricashun; mä maynachush mullcuycan wayunanpaj; mä waytaraycannachush; granadacunapis mä waytaycannachush. Chaychömi musyachishayqui rasunpaypa cuyashäta.

¹³Alayrimi mandragorapa alli asyayninpis mayacaycämun. Ñaupanchïchöga intërupami caycan tucuy casta frütacuna: chaquisha frütacuna, chayraj pallarisha cajpis. Chaytaga gampämi acrashcä.