Cantares 3:3-7

³Siudäta täpaycaj runacunata tapucö «¿Manachu gamcuna ricashcanqui cuyaynëta?» nir.

⁴Tapucushäpita aywaycashallächönami cuyaynëtaga tarircö. Nircorga maquipita janchacurcur mana cachaypa pushä mamäpa wasinman.

⁵Munti lluychucuna-raycu, tarushcuna-raycu aunimay ari Jerusalén jipashcuna cuyaynë puñucuycajta mana ricchachinayquipaj. Puñucuchun puñuyta sacsashanyaj.

⁶¿Imaraj goshtay ichiraycajno chunyajpita aywaycämöga? ¿Imataj aywaycämun mira perfümiwan insinsuwan cupacusha, cuyayllapaj alli asyaj perfümicunawan cupacusha?

⁷¡Chayga Salomonpa andasninchaj! Sojta chunca (60) suldärucunapa chaupillantami aywaycämun. Chay suldärucuna Israelchöga caycan jinyunnin cajcunallami.