Cantares 1:1-12

¹Salomonpa cantanancunapita mas cuyayllapaj alli caj cantana.

²¡Ay, mucharcamanquiman ichanga! Cuyacuyniquega bïnupitapis mas allimi.

³Perfümiquipa asyaynin maysi musquicuyllami. Quiquiquimi chay perfüminöga caycanqui. ¡Chaymi jipashcunapis cuyashunqui!

⁴¡Pushacamay ari! ¡Raynillä, wasiquiman pushacamay ari! Yanasancuna Gamwanga cushishami goyäshunpaj. Chaychönami yarpäshun cuyacuyniqui bïnupita mas alli cashanta. ¡Rasuntachari jipashcunaga cuyashunqui!

⁵Jerusalén jipashcuna yanalla carpis cuyayllapämi cä. Cedar runacunapa tolduncunano oguimi cä. Salomonpa cuartuncho chaparaj tëlacunano cuyayllapämi cä.

⁶Ama ricapämaychu yanalla cashätaga, ni shanaywan yanayasha cashätapis. Turëcunami nogapaj rabyacarcäriran. Chaymi übas chacracunata täpachimaran. ¡Quiquëpa übas chacräta ichanga mana täpashcächu!

⁷Cuyaynë willamay ari, ¿maypataj uyshayquicunata michinqui? Las-dösi inti fiyupa shanashan öraga ¿maymantaj llantucachej gatinqui? ¿Imanir-räshi puriycäman amïguyquicuna uywancunata michicushan guepanpa guella puricachaj warminöga?

⁸Cuyayllapaj warmicunapitapis mas cuyayllapaj warmi, mana musyashpayquega uyshacunapa yupillanpa ayway. Michicojcunapa chucllancuna caycashan lädullanpa cabrayquicunata michicuy.

⁹Cuyaynë, gamga adurnuyquicunawan canqui faraonpa carrëtanta garchaj cuyayllapaj fïna yëwannömi.

¹⁰Cärayquega arëtiquicunawan cuyayllapaj achicyayparaj-achicyaycan. Cuncayquipis perlas wallgacunawan cuyayllapaj camaraycan.

¹¹Gori adurnucunatami rurapäshayqui. Yuraj guellaycunatami churapäshayqui.

¹²Ray jamarashanmanpis perfümiwan cupacushäpa asyaynenga mayacaycanmi.