Caeltueih 15:20-31

²⁰Tedae mueirhol kah a tihnai, cukhalhnah, rhawnkhak sa neh thii te rhael ham amih taengah ca ka pat.

²¹Moses cabu te khosuen rhuirhong lamkah khopuei takuem ah a thui uh. Te te tunim ah om tih Sabbath takuem ah a tae coeng.

²²Te vaengah caeltueih rhoek, patong rhoek neh hlangboel boeih loh, manuca rhoek khuiah hlang aka mawt Barasabbas la a khue Judas neh Silas te amih lamkah hlang la tuek tih, Paul neh Barnabas taengah Antiok la tueih ham ol a tloek.

²³Amamih kut neh, “Caeltueih rhoek, patong rhoek neh manuca rhoek loh Antiok, Syria neh Kilikia tom kah manuca namtom rhoek te ka uem uh.

²⁴Hlangvang tah mamih taeng lamkah nong coeng tila ka yaak uh. Nangmih kah hinglu aka toeh olka dongah na hinghuen uh. Amih te ol ka paek uh dae moenih.

²⁵Te dongah tun ka hui uh tih, “Nangmih taeng neh mamih kah thintlo Barnabas neh Paul taengah hlang tueih ham tuek sih,” a ti uh.

²⁶Amih tah Jesuh Khrih, mamih kah Boeipa ming ham a hinglu aka voei hlang rhoek ni.

²⁷Te dongah Judas neh Silas te ka tueih uh. Ahmih rhoi khaw amah hmuen la olka neh ha puen rhoi.

²⁸Te te kuek mai cakhaw thinrhih neh nangmih muep nan pawt ham, kaimih ham khaw Mueihla Cim neh ka poek uh.

²⁹Tedae mueirhol buh, thii, rhawnkhak neh cukhalhnah tah rhael mai. Te khui lamloh namamih na cue uh te hnothen ni na saii eh, sading la ne, “tila a daek pah.

³⁰Te dongah amih tah phih uh tih Antiok la suntla uh. Te phoeiah rhaengpuei te a coi tih capat te a paek uh.

³¹Thaphohnah te a tae uh vaengah omngaih uh.