Buka Linge 9:5-20

⁵Ighoe to tughuru pungisira na lei kema me havukaghinira na tangohahi; mo ghuduri kehai na ahadira ke va me vaa.

⁶Na ghagua na levunimate tara topou nia na mateagu; hauva mana komudira te parihai. Sughua didira na vatei ghanaghana oli tara vuti kehai na lei komu tara sivi.

⁷Ma nina uhuhuli Lord ke va me vaa; ma nina dete ke tona haliu tana malei kabuna.

⁸Agaia ke detea na maramana nia na maemane; me ke uhulira na lei kema taonia na hava te kaekage.

⁹Ma Lord ke ungaunga vanira ara hei tara uhulira nia na vahaghitaili, agaia na ungaunga tana bona ni aho ni vahola.

¹⁰Agaira ara hei tara ghilala na ahamu mara taluutunigho ighoe, a Lord, ko mua tangomana ge ko tona keha itatana siki sakai te kene taonigho.

¹¹Linge holohaba vania Lord ilokana Jerusalem. Bosa vania na maramana te mua nia ponolio na hava te gonia.

¹²Ma gaia te vahea na vahaghitailia ahei te mate tinoni, me righitaonira tara bona. Me mua nira ponolio ara hei tara ngangaraha vania nia na hahanga.

¹³Lord, ko aroviu. Righia ivei te vagha tu nea na vahaghitaili tana limadira ara hei tara kanahaghiniu. Ko lavikehau tana mate Lord.

¹⁴Ko vavolau, ge ke tangomana na holohabaamu tana mavitu, tana mataulana Jerusalem, ge ku togotogo na pukuna ighoe to vavolau.

¹⁵Na lei kema tara kutu horu ilokani na lei gilu tara ghelighi vanira rana keha. Ma gaira tara hogho oli heghedira ta didira na vugho.

¹⁶Ma Lord te ghilala tua nina na maemane. Marana tangohahi tara hogho heghedira ta didira na tangohahi.

¹⁷Rana tangohahi kara tona horu tana gilu ni mate. Aeni gaia na kakalena vanira na lei kema tara mua ghilala God.

¹⁸Ma gaira tara lio ni hahanga kara mua ghoi nira ponolio tua ke va me va. Ma didira na ghanaghanadila rana bona kara mua ghoi sonikeha.

¹⁹Tughuru dato age Lord! Mo ko bei lubatira na lei tinoni tara mua liona na taoniamu! Mo ko lubatira na lei kema ge kara dete ta nimua na kinakabu.

²⁰Ko nera ge kara nia ribe na mataghu, age Lord. Lubatira ge kara ghilala agaira na tinoni gogoni vamua.