Buka Linge 92:1-15

¹Na linge vania na Sabbath Lord, E uto sughua na holoutoamu nia na linge ni holohabaamu ighoe God to Haba i kokou.

²Ladavaghinia nimua na dolo tona haliu tughu roropo, mana volamu te utuni tana lei bona na aho te bongi.

³Nia na lei lingelinge ni ghalevu mana ukalele, mana lei talama ni tigitigi ghua.

⁴Lord, inau tu nighi togotogo na lei nimua lutu sule to gonighi, na pukuna na hava to gonia tu nia rivurivu na malei limamu.

⁵Lord, na lei gehegehemu te sule ngangata mana lei ghanaghanamu te lalo ghua.

⁶Na voo ke mua ghilalaa na totobo eni, ma hei te bule ke mua tangomana na manahana.

⁷Rana dika tara totolo dato vaghara na tautalu ma rana tangohahi tara uto so.

⁸Hauva, ma gaira udolu kara durakera, na pukuna ighoe Lord to haba vule haia tua.

⁹Ighai tai ghilalaa ghamua na kana kara mate, ma rana dika kara laga vulera.

¹⁰Mi ghoe Lord, to neu tua ge u laga vaghaa na bolo asi, mo vautou nia na togotogo.

¹¹Inau tu righia tua tara lagavulera ghagua na kana, mu rongovia didira tangi rana dika.

¹²Rana uto tara katukatu vaghara na lei ghai cedar ni Lebanon.

¹³Gaira te vaghara na lei ghai tara subara lokana valena a Lord, mara haga lokana nina valetabu dida God.

¹⁴Tara vangagha so tara haulaghi manaa, gaira tara laga vaghara so na ghai vaolu.

¹⁵Keri te tatea a Lord te maemane utuni me taho siki totobo ke hahi i tatana.