Text copied!
CopyCompare
Na Rongorongo Uto nina Jesus Christ - Buka Linge - Buka Linge 89

Buka Linge 89:5-50

Help us?
Click on verse(s) to share them!
5Lord, gaira i kokou tara nighi togotogo, na lei totobo uto to gonighi.
6Lord, e taho siki sakai kokou te vaghagho ighoe, e taho ghua hei tadira na lei tarunga vetena ke kaekagemu.
7Ta didira vaukolu rana tabu tara talumavagho igaa, gaira udolu tara nigho kikinima ghua.
8Lord, God, puku ni maana, taho tua hei ke sule vaghagho ighoe vamua to utuni tana lei totobo soko.
9Ighoe to vunaghina na tahi, mana bona te tughuru mai ga na maraghata, to bosa vania na tahi ge beata.
10Ighoe to lagavulea Rahab, mo havukaghinira ghamua na kana nia na limamu.
11Na maramana i kokou a nimua, mana maramana i ani pari ghua a nimua, ighoe to gonia na maramana talighu mana lei totobo soko ilokana.
12Ighoe to gonia i ulu mi boko, na ghotu i Tabor, mana ghotu i Hermon toro holohabaa na ahamu.
13Ighoe to loghoa na maana sule ngangata, e sule ngangata na lagamu!
14Nimua na malei sopou ni haba te uto mu maemane, na dolo mana utuni te tate tana lei totobo uto to gonighi.
15Holoutora gaira tara rongovi togotogoa nimua hoholo ni holohaba, gaira tara kabu lokana na mararana nimua na veiarovi.
16Gaira tara togotogo tana bongi mana dani, tara holoutogho ighoe to uto haliu.
17Ighoe to neghai ge ai lagavule, na lagamami te tuturi kauha ta nimua na veiarovi.
18Lord, ighoe to heghai gaia te podopodoghai, ighoe God ni Israel to tabu, to heghai mai a nimami vunaghi haba.
19Tana maturu bole to kokoe vanira nimua prophet i dania, mo ghaghua, “Inau tu hangaa tua na malaghai rongoragha, mu vilia tua tadira na vure subo a gaia ke vunaghi haba.
20David gaia nigua na ghairau tu vilia ge ke vunaghi halikama nia na siusiu tabu tu siuvia nia.
21Na laga tu loghoa i tatana haia tua, a nigua na maana ni laga keri ke nea ge ke lagavule.
22Ghada na kana kara mua tangomana ta tughuru pungisiana, ma rana dika kara mua laga vulea tua.
23Inau ku turiu lakusara ghana mate tana matana, mu ku havukaghinira tara kanahaghinia.
24Inau ku lutu vania nia na utuni mu ku kabu rurughu i tatana, ku nea ge ke laga vule haia tua.
25Inau ku talua ge ke righitaonia na tahi, maia ghua na lei beti tavetave.
26A gaia ke bosa vaniu, “Ighoe a Tamagu, ma nigua God, Ighoe to righitaoniu mo volau.”
27Inau ku nea ge ke dalegu na kamanagho, me ke haba vulera na lei vunaghi haba ni maramana talighu.
28Inau ku dolovia mu ku arovia haia tua! Ma nigua na baubahu tu nia vania ke mua ghoi soko tua!
29Inau ku nia na vinavahuhuna ge ke sopou ngasi, ma nina malei sopou ni haba te kabu kasila vaghaa na parako.
30Kara ba mua taonia nigua na vetena na lei vinavahuhuna, ma kara mua kabu taonia nigua na huhuli.
31Kara ba nighi sika nigua na lei bosa ni tarai, ma kara diui nigua na lei vetena ke.
32Ge ku hera na totoro te manadira, mu ku ramusira nia nigua na ghai ni raramu.
33Ku mua ghoi soko tua na doloviana David, mu ku mua ghoi nia ponolio tua nigua na baubahu tu nea vania.
34Ku mua diua tua nigua na bosa ni baubahu, mu ku mua laviolia siki bosa ni baubahu tu bosa horua tua.
35Inau tu nia papari tua na ahagu, me vahola vaniu tua ge ku pegoa David.
36Na vinavahuhuna ke kabu kasila, ma nina malei sopou ni haba ke sopou ngasi vaghaa na aho i kokou.
37Gaia ke kabu kasila vaghaa na vula, te ladavaghiniu mai kokou.”
38Mi ghoe to rutu vania nimua na vunaghi haba vivili! To sogha sania mo nia sika.
39Ighoe to sokoa nimua na baubahu kolua gaia, mo sonihorua ghana pitiulu ni haba tana pari.
40Ighoe to durakea na pilupiluna na komuna, mo dikalaa nina vatei polo.
41Gaira tara haliu i lilighina tara gitoi nina lei totobo, ma ghana komu kolu tara kiahaghinia,
42Ighoe to nera ge ra lagavule ghana na kana! mo nera ge ra togotogo.
43Ighoe to nia nina isi ge mua kale, mo hove na hangana tana sura.
44Ighoe to lavikehaa nina malei haba, mo pitihorua tana pari nina malei sopou.
45Ighoe to va kukului na bongina tana garimaneana, mo lavi mamaana tana mata ni tinoni.
46Lord, engiha vaho ke soko nimua na rutu, te ruruhu vaghaa na lake! ko polo haia tau?
47Ko ghanaghanaa na kukuluna na volagu, e taho na pukuna ge puputu mai na tinoni tana maramana eni.
48Na lei tinoni udolu ke mate mughua, me taho tua hei ke polo ta nina maana na gilu ni mate?
49Lord, ivei gaia nimua na vuivuni ni dolo? To bosaa vania David, ta nimiu padalaghi kaukolu?
50Ko ghanaghanaa, ivei tara nea na bosa dikalaamu, inau nimua na ghairau.

Read Buka Linge 89Buka Linge 89
Compare Buka Linge 89:5-50Buka Linge 89:5-50