Buka Linge 78:51-62

⁵¹Agaia te va matera na lei meomeo mana kamanagho itadira na lei sopa binaboli tadira na lei binaboli te talighutia i Egypt.

⁵²Gaia te hulira na kulana vure vagha na righitaoni sheep. Te righitaonira i lokana na bona mamaha.

⁵³Gaia te huli tatavahalera ge ra mua mataghu. Hauva mana tahi te saopo savura ghadira na kana.

⁵⁴Me hulira vaa tana komu, na komu tabu, tana lei ghotu te sagui tana sura.

⁵⁵Agaia te tiva kehara na vure tana bona tara ghadaru. Me tuvalighi didira pari, ge talura na kema ni Israel tana komudira.

⁵⁶Ma gaira tara hughuhughu kolua God, puku ni maana mara tabotaboa. Ma gaira tara mua taonighi na lei nina vetena.

⁵⁷ara hughu bosana, mara mua ghanaghana mava vagha tara nea ga lei kukuadira; me taho tua hei ke ghanaghana mavara.

⁵⁸A gaira tara lavi rutuna nia didira na lei bela ni sukaghi vanira na lei God keha. Me nighi rutu ghua didira na lei titinoni ni God keha.

⁵⁹Tana bona God te rongovira, ge rutu ngangata vanira. me nira sika tua na lei kulana vure.

⁶⁰Keri ge sogha sania na valena i Shiloh, Lokana na komu te ghanaa iga ighobuda.

⁶¹Agaia te talana na ghada na kana ge ra sagua na bokisina na vetena, na marena nina maana mana rongoragha.

⁶²Agaia te rutu vanira na kulana vure heghena, Me taladira ghadira na kana ge ra labura.