Buka Linge 74:3-20

³Ko sakutua tona tana lei sonitavu taeni tana komu. Ko righia a nimua na bela tabu tara durakea ghamami na kana.

⁴Iga ghamua na kana tara nia ngingili na togotogo ta nimua na valetabu. Iga tara talu datoi didira na vikuviku na vaughilalana ni laga vule.

⁵Ma gaira tara durakea na mataula te vaghaa na tinoni te tangi ghai tana tautalu. tara toka horui na lei ghai nia didira na lei posu.

⁶A gaira tara rimerimei na lei galegale: nia didira posu mana ivi.

⁷Ma gaira tara durakea nimua na vale tabu, mara tungi lakena me tao pari. mara metoa na bona ni holohabana na ahamu.

⁸Ma gaira tara ghanaghana ge kara taghalaghi nighai, ge ra kerei na lei bona tabu ni holohabana ga God.

⁹Ighai tai mua righia siki vauvautu, me taho siki prophet ghua. A hei tatada te ghilala na sosokona na totobo eni.

¹⁰Lord, e ghua ge ra kia haghinigho daro bona ghamami na kana. mo taladira ge ra batobatoa haia na ahamu.

¹¹E ghua ge o hove na hangamami, me ghua ge mua gonia siki totobo vanighai?

¹²Mi ghoe God, a nimami na vunaghi mai tua tana vuivuni, me subo na bona ta vavolaghai tua.

¹³Ighoe to vokasia na tahi nia na lagamu. Mo bohai na uludira na lei maumanu ni tahi.

¹⁴Mi ghoe to paruhai na uludira: mo kutira na lei maumanu ni bona mamaha nia na hulidira.

¹⁵Ighoe to gonighi na lei vuravura mana lei beti toghotogho, me va mamahai na lei beti tavetave.

¹⁶Ighoe to gonia na bongi mana dani mo gonighi na lei veitughu, na vuha mana aho ghua.

¹⁷Ighoe to kobe voka na maramana: mo gonia ghua na bihi mana papara.

¹⁸Maghutu ko ghilala tara kiahaghinigho ghamua na kana: Gaira tara mua manahana God, mara nigho sika.

¹⁹Ko bei tona sanira nimua na vure tana limadira na ghadira na levunimate: mo ko bei nira ponolio kulamu na vure tara vahaghitaili.

²⁰Mo ko ghanaghana na baubahu te bahu ghai nia: na gunaguna te kale tana lei piuna na komu, te pungi ga.