Buka Linge 71:8-24

⁸Keri ge ku mua ghoi beto tua na holoutoamu; Inau tu talutatea na ladamu tana dani udolu.

⁹Mi taeni, tana tonikamagu, ko bei talu kehau. Ko bei saniu tana bona ku kubolu na lagagu.

¹⁰Na lei ghagua na kana tara niu vaevane kolu, gaira tara padangi koukolua na mateagu.

¹¹Ara bosa mara ghaghua, “A God te talukehaa tua, Gatu ma ka lavia tua, na pukuna te taho tua siki sakai ke ghoi hangaa.

¹²Ko bei kapu sagau, Ghe God. Mina mo ko hangau ghe nigua na God.

¹³Ko va hera na totoro mana haurake agaira tara hughuhughu. Na mamaagha mana totoro ke sarora, agaira tara liona na ghighirouagu.

¹⁴Hauva ka, mi nau ku talua haia so itamua nigua na ghanaghana ge ko hangau, ke papara nigua na holouto vaniamu.

¹⁵Inau ku bosa vanira na lei vure soko a nimua na kabu marabu. Inau ku ladavaghinia nimua na maana ni vavola. Nia Inau to laga vuleu tua na lei totobo soko to gonighi vaniu.

¹⁶Nimua na lei gehegehe tara mava ngangata, Ghe Lord, puku ni haba. Ku holoutogho nia. Inau ku kokoea vanira na lei vure soko, ge ighoe heghemu vamua to maemane mo to uto lee.

¹⁷Tana pileagu mai vaho tua to vuivuni ni taraiagu tua Ghe God. Mi nau tu mua beto tua na bosaana vanira na balu nia na utoni na lei totobo to gonighi.

¹⁸Mi taeni Inau tu tonikama tua me vuare tua na vuvulu ni ulugu, mo ko bei talu kehau gea ghe God. Inau ku ladavaghinia nimua na maana tara vavata vaghana eni; nimua na lei butuli sule ngangata vanira agaira tara mai i murigu.

¹⁹Na lei nimua na gehegehe uto, Ghe God, tara riti i kokou; Ighoe to gonighi na lei totobo utoutoa, Ahei ke nigho tautau pa ka Ghe God?

²⁰Ighoe to talagu ge ku nighi vahaghitaili na lei vahola, hauva ka, mi ghoe ko ghoi talu goni oliu sono tana vola mo ko sake datou tana bona ni gilu.

²¹Ighoe ko ghoi talugoni oliu ghua, haba va, tana talu mavaa sule ngangata mo ko ghoi togho luvu ghua.

²²Keri ge ku holoutogho nia na tigitigi mana ghalevu. Na pukuna to talua nimua na taluutuni ta nimua na lei baubahu, Ghe God. Inau ku nia linge vanigho na ghalevu ghalo. Ighoe na puku ni tabu ni Israel.

²³Inau ku nia ghaeghahea na togotogo mu ku nighi lingelinge nimua na lei holouto. Ighoe to vavolau Inau.

²⁴Tana dani udolu, Inau ku tughunitatei na lei nimua na gehegehe tara marabu, ge ara hei soko tara tabotabo ge kara niu ghighirou tara mamaagha mu laga vulera.