Buka Linge 71:1-12

¹Ighoe a nigua na hahanga ni vola, Ghe God, ko bei lubatiu ge ku nia kale torotoro.

²Vavolau tana vahaghitaili, ko pilupungisiu itadira na lei ghagua na kana; Ighoe to maemane, ko talu kulimu mai itagua ge ko varongohiu, mo ko niu tatavahale tana kaukauli.

³Ge ke vaghagho na vatu ni pilupungisi vaniu, to lavipangotiu haia iga, ko nia hevei na bosa ni vevetena ge ke vavolau. Ighoe nigua na vatu ngasi mana vatei tuturi kauha.

⁴Ko vavolau ta didira na maana na lei tinoni dika Ghe God. Ta didira na lei hughuhughu na lei tinoni dika tara kana haghiniu.

⁵Ighoe heghemu vamua, ghe Lord, a nigua na ghanaghana dila. Tana pileaghai mai tua ghe Lord, Inau tu ghanaghana ngasi.

⁶Eo, Ighoe to kabu koluu mai tua tana vahuagu, mi tana kutuna tinagu, Ighoe to righitaoniu mai tua mughua ge u holoutogho.

⁷Na volagu ke, na vavaghaha vanira tara subo; na pukuna ighoe ke a nigua na laga mana pilupungisi.

⁸Keri ge ku mua ghoi beto tua na holoutoamu; Inau tu talutatea na ladamu tana dani udolu.

⁹Mi taeni, tana tonikamagu, ko bei talu kehau. Ko bei saniu tana bona ku kubolu na lagagu.

¹⁰Na lei ghagua na kana tara niu vaevane kolu, gaira tara padangi koukolua na mateagu.

¹¹Ara bosa mara ghaghua, “A God te talukehaa tua, Gatu ma ka lavia tua, na pukuna te taho tua siki sakai ke ghoi hangaa.

¹²Ko bei kapu sagau, Ghe God. Mina mo ko hangau ghe nigua na God.