Buka Linge 68:1-26

¹Vania na tinoni gehe linge: Nina Linge David Ko tughuru dato, Ghe God, mo ko havukaghinira na lei ghamua na kana. Lubatira gaira tara mua liona God hava sama ni vola.

²Ko riu kehara vagha na ahu te ghurihi kolilia na ghuri. ko nira ge kara obo vaghara na soi ni midua tana lake. Lubatira rana tangohahi kara taghara tana matana God.

³Lubatira rana tinoni taluutuni maemane kara rivurivu, lubatira ge kara rivurivu tana matana God. Lubatira ge kara nia rivu na togotogo.

⁴Lingea na linge ni holoutoana God vania na ahana! Kau nia linge ghaeghahe dato na holouto vania agaia te sopou i vuvungani na lei ghobaghuli. Na ahana gaia, Lord, togotogo ma kau rivurivu tana matana!

⁵A tamadira tara mua tamagha, mana pilupungisi vanira rana lei vinekama mate sasani. Aeni gaia God, na valena te tabu.

⁶God te talugonira te aroha na tobadira mara kabu sagau tana lei binaboli; gaia te va hera na tatavahale rana kabu pipiti me va hera na togotogo. Ma vanira rana diu vetena, na ngengere mana vahaghitaili vamua te gonidila vanira.

⁷Tana bona te huli rughu horura nimua na vure tana komu Egypt, Ghe God, Tana bona tau tona potaa na tautalu asi.

⁸Na maramana te anuanu, mana uha ni kokou te kovala horu mai tana matamu, Na God ni Sinai. tana matamu, Ighoe God ni Israel.

⁹Ighoe to nia hevei ma na uha te mua soko butu, Ghe God, ge ke va vuli malobui na lei raurau tana komu ni baubahu.

¹⁰Tana komu keri nimua na vure kara kabu, mai kolua ghua nimua na lei uto, Ghe God, Gonidila vanira nimua na vure tara liogu na hahanga.

¹¹Na Lord te bosa tatea na laga vule, mana lei ovuovu ni vinekama tara nia ghughu na rongorongo te togotogogha.

¹²Na lei vunaghi haba rana kana kolura didira na ovu ni kisumate kara sama havukaghi keha, marana lei vinekama ni Israel tara tuvalighi na lei totobo tara lotighi.

¹³Sakai mana tana ghanara tana lei vatei ghoro kolu ni sheep, itaeni agaia tara sarora nia na Silver mana Gold. Vaghaa na kavuku te kuvihia nia na ghatana.

¹⁴Na puku ni maana te havukaghinira na lei vunaghi haba tara kanahaghinia vaghara na pughupughuna na bihi tana bona ni maraghata vuvungana na ghotu Zalmon.

¹⁵Na lei ghotu ni Bashan tara haba vagha na vunaghi, tara tughuru bebete dato i lokana na parako.

¹⁶E ghua ge au reirei vaghaghau tau mua tangomana, Ighau na lei ghotu tau mua maheboa va tana ghotu Zion na ghotu God te vilia ge ke ghaha iga, A Lord heghena ke ghaha iga ke va ma va?

¹⁷Te talighutia na togha mana togha ni taitakiro, tara mua tangomana na idumiani; A Lord te butu mai tana ghotu Sinai me va haghe tana bonana te tabu.

¹⁸Tana bona dato tana malei haba i kokou, ighoe to hulira na ovuovu ni tinoni tara kabu pipiti. Na lei vure tara va hegho na dolo, haba va agaira tara nigho ghighirou. A Lord God ke kabu ighobuda iani taeni.

¹⁹Holoutoa a Lord, holoutoa na vavolada God! Agaia te bolo ghalagha ghita tana luhuna tana lei bona soko.

²⁰Ghada na God, na God te vavola. A God, puku ni haba, te vavolaghita tana mate.

²¹Hauva ka, A God ke paruhai na uludira tara kanahaghinia, me ke gholahighi na lova ni uludira ara hei tara dolovia na lei gehegehedira tana dika tara mate tua.

²²A Lord te ghaghua, “Inau ku lavi rughu horua mai na lei ghaghua na kana sania Bashan, Ku lavi datora sania na boro ni horara.

²³Ighau, nigua na lei tinoni, kau sani na tuamiu nia na ghabudira, hughua nimiu na lei kau kara lavighi na tunuvadira!

²⁴Na lei tinoni tara ghilala na tonatonamu, Ghe God, Na tonatonana nigua na God, mana vunaghi haba. Tana bona te tona va tana bonana te tabu.

²⁵Ara hei tara lingelinge tara pala inagho, Mara hei tara gougonu taonighi na lei linge tara pala i muri; kolura na lei tahula tara pupu mara taberuru.

²⁶Holoutoa God, Ighau udolu rana Israel; holoutoa a Lord te hevei na lei totobo ni vola soko vanira rana Israel.