Buka Linge 66:4-17

⁴Na lei totobo soko iani pari kara holohabagho kara linge na vatei holoutoamu, kara nia ghaeghahe na ahamu tana lei linge ni holohabamu.

⁵Kau mai, ma kau vaevanea na hava a dida na God te gonia, Ivei vaho tua te vagha na butuli sule ngangata, te gonighi vanira nina na vure!

⁶Agaia te nia na horara sisi ge samavoka, mana halautu ighobuna te mamaha: ma nina na vure tara sakusaku tua halavu levu ni pari mamaha. Mai ma ka togotogo itatana ahei agaira na tinoni ia eni.

⁷Nia nina na maana te laga au vule, agaia ke huhuli ke va me vaa. Agaia te mata reireighi didira na lei gharasu na lei kema! Bei lubatira na diu bosa ke sule ghalagha tara mua taotaoni.

⁸Lubatia na maramana talighu ke vautoa dida na God, ma kara nia linge ghaeghahe dato na holoutoana.

⁹Tana limana te kaputia na volada, me righitaonighi na lei tiola tana saisarikiba.

¹⁰Ghe God, Ighoe to tabotaboghai; Ighoe to va marabughai vagha na marabuna na silver tara apo marabua tana vatei marabuana.

¹¹Ighoe to lotighai ilokana nimua na vugho mo pitia tana vuvungamami na kaukauli ni tinoni lutu.

¹²Ighoe to goni dilai na lei ovu ni kisumate ge kara turi bitai na lei hulimami tara tautaruha. Ighai tai tona potai na lake mana lualua. Hauva, mo lavighai va tana bona te subo au vule iga nimua na hevei ghe a God.

¹³Ge ku vakalei na lei baubahu tu nighi vanigho tua, Inau tu nia mai vanigho na sukaghi kekere ta nimua na vale te tabu.

¹⁴Eo, na lei baubahu hola tu gonighi to rongoviu tana bona tu ghahau ilokana na vahola sule.

¹⁵A keri vaho tua na pukuna ge u nia sukaghi vanigho na sukaghi kekere. Na bolo te marabu me korukoru vulei nigua na lei bolo soko te vagha na kokolo uruurua to lavipangotia. Mu ku nia sukaghi na lei buluka mana goat.

¹⁶Ighau udolu tau nia kikinima God, kau mai ma kau vaovarongo mu ku tughunia vanighai na hava te gonia vaniu,

¹⁷Inau tu nia ngangaraha dato vania na hahanga, mu holoutoa tana bona tu kokoe.