Buka Linge 57:1-10

¹Vania na tinoni te gehe linge: nina linge David, tana bona te ghogho sania a Saul me va polopolo ilokana na vatuluma. Linge taonira na hulu (tangi na linge) “ko bei haurake.” Ko aroviu, Ghe God, Ko aroviu! Inau tu kene taonia a nimua na pilupungisi. I sarana na ungaunga ni ghatamu ku polo, koekobe ke soko tahaliu na maraghata dika.

²Inau ngangaraha dato vania God te haba vule, vania gaia ge ke vakalei nina lei ghanaghana dila vaniu.

³A gaia God ke nia hevei horu vaniu mai nina na hahanga ni kokou ge ke vavolau nia. Ge ke lavi kehau itadira agaira tara rughuhoru mai ge kara lakusau. A nigua na God ku nia hevei vaniu mai nina dolo mana utuni ke mua soko buto.

⁴Na lei bolo ghaghala tara ruturutu tara talighutiu. Na livodira tara vavangalua vaghai na tinabe ma kuali, mana lapidira tara kuikurisi vaghai na lei isi.

⁵Ko haba vule, Ghe God, vulei kinakabuni kokou tara haba vule dato. Na mararamu ke mararaa na maramana talighu.

⁶Na lei ghagua na kana tara lohi dalau na piti ni tarikauagu. Na kanoragha te nia veveru na huligu. I ghobuna na halautugu tara ghelia na gilu sule, Hauva ma gaira heghedira sono tara tumu haghe ilokana.

⁷Na tobagu te ghanaghana kodo itamua, ghe God, mughua ge u tangomana nigua na lei linge ni holohabamu.

⁸Ko rarai, ghe na tarungagu. ko rarai, Ghe na ghalo ni titigi ghalevu mana ghalevu ghalo. Inau ku nia rarai labota nigua na linge.

⁹Ghe a Lord, Inau tai holoutogho tana matadira na lei tinoni soko Inau ku lingei na vatei holohabamu ighobuni na lei kema.

¹⁰Nia nimua na dolo te mua soko buto te datogha vagha na kokou mana parako. A nimua na puku ni utuni te saravighi na lei ghoghopa.