Buka Linge 56:1-10

¹Vania na tinoni gehe linge, nina linge David, taonia tana bona rana lei Philistia tara kene taonia i Gath. Kara linge taonia na tangina na bola tana ghai, tana bona sagau. A ghe God, Ko aroviu na lei ovu ni kisumate tara levunimate vaniu tara lutu ngangatau Hei ghagua na kana tara gunaliu na dani udolu.

²Ra lei ghagua na levunimate tara bosa horu inau haia ma subo tara gunali tabou tana didira na talunagho.

³Mi tana bona te torou na mataghu, Inau tu talua nigua na ghanaghana kodo itamua.

⁴Aghe God, Inau tu holoutoa na hava to bosaa. Inau tu ghanaghana kodo itatana God, me ghua ge ku ghoi mataghu? Na hava ku tangomana ge ke gonia vaniu na tinoni lee?

⁵Gaira tara riukaghinighi haia na hava tu bosai tana lei bongidira tara padalaghinighi na lei halautu ni vahaghitailiagu.

⁶Gaira tara mai sakai sonikolu ge kara vaevane popolou, vaevane taotaoniani na lei sakusaku tuagu, tara liona ngangata na mateagu.

⁷Ko bei lubatira ge kara nia tona keha kolua didira na gehegehe te dika. Mi ta nimua na rutu papara, Ghe God, ko nira rabo horu tana pari.

⁸Ighoe to mata reireighi na lei nigua na dikalio. Ighoe to vahikolui na lei kolobu ni matagu ilokana nimua na vauvaghu. Ighoe to gegere horu sopasopai ta nimua na buka.

⁹Mi tana dani ia ku hologho ge ko hangau, na lei ghagua na kana kara liliu ni doloviagu. Aeni tu ghilalaa: God te levu ni pala vaniu.

¹⁰Ghe God, Inau tu holoutoa na bosamu: Eo, a Lord, inau tu holoutoa na bosamu.