Buka Linge 49:1-15

¹Kau rongovia aeni ighau udolu na lei vure; Ighau udolu tana maramana kau varongohighi.

²Haba mana kubolu, tinoni sosodo mana bona, kau rongo!

³Na lei bosagu te vonughia na manaha; mana lei ghanaghanagu te nia vonu na ghilala.

⁴Inau tu varongohi pukupukua na lei vavaghaha mu ku tatea nigua na bosa tana ghalevu ghalo.

⁵E Taho na hava ku mataghunia tana bona ni gunagunagha. Tana bona na levunimate tara talighutiu.

⁶Gaira tara ghanaghana kodo tadia na lologho au. Mara nighi mangamangagha didira na sosodo au.

⁷Me taho siki sakai tadira ke huiolia heghena tana mate mana peluana nina peluoli God

⁸Na huioli te mua malumu na maiana Me taho siki sakai ge ke pelu aua.

⁹Me ke vagha ge ke vola kasila me ke mua righia na maramana ni mate.

¹⁰Mara hei tara manaha kara mate, te vaghara na bule mana toba kupi. Ara luba sanighi didira na sosodo au i muri.

¹¹Na puku ni komudira na maramana ni mate, gaira kara kabu igaa ke va me va; Mara holo taonira nia na bona keri, mara sanighi didira na lologho vanira na keha.

¹²Ma gaira kara mua kabu daro ta didira na lologho au; Gaira kara mate vaghara vamua na lei maumanu.

¹³Aeni te vagha didira na hahi tara bule mara talu sulera heghedira.

¹⁴Te vagha na sheep tara hulira va i betidalo, na mate te vatoghaa vanira vagha na righitaoni. rana uto kara umaghi pungisira te puipungi mana hulidira ke vuvuha tana gilu ni mate ke hauvia na komu tara haghara igaa.

¹⁵Ma vaniu inau, God ke huiolia na volagu; Agaia ke lavi kehau ta nina maana na mate.