Buka Linge 38:7-19

⁷Na levugu te paralamuta: Me taho na laga ni vola tana huligu.

⁸Inau tu labe mu tapele kolili: mu gutuveve na pukuna na maghae tana lokagu.

⁹Lord o ghilalai na hava tu lioni, ma nigua na dikalio te mua polo itamua.

¹⁰Na tobagu te tuputupu mana lagagu te kubolu mana reireina na matagu te taghoi

¹¹Rana kulagu mana ghagua udu tara tabalili keha tana vahaghiagu, ma rana kulagu na vure tara tughuru sagauviu.

¹²Ra hei tara liona na hola kehana na volagu tara lohi ghagua na piti: Ma gaira tara tona olioli na kanahaghiniagu tara vavaranga mana kene ghanaghanaana na halautu ni posoagu.

¹³Mi nau te vaghau na tinoni te pui me mua rongo te vagha na tinoni te laghu, te mua vukesia na mangana.

¹⁴E utuni, inua tu mai vuha vaghau na tinoni te mua rongo, mana mangagu te mua kokoe tughu.

¹⁵Mi nau tu pitugho so Lord, Ighoe vamua ge ko bosa tughu vanira, Ighoe a Lord, nigua na God.

¹⁶Inau tu liona ge rana ghagua na kana kara bei laga vuleu gea: mi tana bona ku turi padi: Kara bei lavi mamagu gea.

¹⁷Ku mua tangomana tua ge ku ghoi tughuru dato, na pukuna nigua na vahaghitaili haia tagua.

¹⁸Ku toghighi lei nigua na hahi: mu ku nighi dika lio na lei palugu.

¹⁹Ma rana ghagua na kana kara ghahara: mara laga lee: ma gaira tara kanahaghi leau tara subo vule.