Buka Linge 18:14-43

¹⁴Gaia te nighi rana lei nina kuali me havukaghinira na ghana levunimate; me nia vetena vania na viti mara hughuhughu poto.

¹⁵Vaho ta nimua na vevetena, Ghe Lord, mi tana pogaana na ghuri ni aheahemu na horara te mamaha, mana banatana na maramana tara pipili lee.

¹⁶Gaia te hagalo horu mai kokou me vavolau, gaia te holakeha datou tana tahi lalo.

¹⁷Gaia te vavolau itadira na ghagua na levunimate mamata ghugha, mi tadira gaira tara niu sika mara lagavuleu.

¹⁸Gaira tara hughutiu ge kara mateu tana bona inau tu labe, hauva ma Lord te tabe datou.

¹⁹Gaia te uhuliu va tana bona ni kabu mahebo; Gaia te vavolau na pukuna te niu togotogo.

²⁰A Lord te tabau nia nigua na lutu uto; a Lord te vuevugheu nia nigua na kabu maemane.

²¹Na pukuna inau tu taonighi nina na lei vetena Lord; Inau tu mua ririu keha sania nigua na God mu ku taonia te dika.

²²Inau tu righitaoni ngangata nina vetena inaghogu, inau tu mua lugu na righitaoniani nina vetena.

²³Inau tu maemane tana matana God; inau tu mua lugu na righitaoniu heghegu tana tangotangodika.

²⁴A Lord te tabau nia nigua na lutu uto; na pukuna te marabu na limagu, te marabu tana matana.

²⁵Lord, ighoe to utuni vanira rahei tara taluutuni utunigho; mo uto haliu vanira rahei tara maemane.

²⁶Ghe, Lord, ighoe to marabu mo tategho vanira rahei tara marabu, ma gaira tara dika, ighoe to kanahaghinira

²⁷Ighoe to vavolara tara talumuri, mo vahaghitailira tara talunaghora heghedira.

²⁸Lord, ighoe to nia hevei mai na marara tana volagu; mo ghuru kehaa na pungi itagua.

²⁹Ighoe to vaheu na laga ge ku vahaghitailira nia na ghagua na kana; mana maana ge ku lagavulea didira pilupungisi.

³⁰Ma vania God, na halautuna te maemane. Na lei nina baubahu Lord tara utuni. Gaia na tako vanira rahei tara rei va itatana ge ke pilupilura.

³¹A Lord heghena te God, God heghena dida na pilupilu.

³²Gaia na God te vaheu na laga, gaia te nea na halautugu ge tatavahale.

³³Gaia te righitaonighi na marevogu vaghaa na deer gaia te righitaoniu tana lei tetete ni ghotu.

³⁴Gaia te gonidilau me naunauu na kisumate, gaia te vaheu na laga ge ku nia va na baghe halo.

³⁵Ighoe to vaheu na takona nimua na vola kasila. na lima madolomu te bereu, me nimua na lio dolo te talu suleu.

³⁶Ighoe to goni okaa na halautuna na marevogu ge kara bei turi madali.

³⁷Inau tu ghurutaonira na ghagua na kana mu lotira; inau tu mua beto koekobe tu lagavulera.

³⁸Inau tu labu horura ge kara mua tangomana na tughuru dato; gaira tara tumu sara ni marevogu.

³⁹Ighoe to vaheu na laga ni kisumate; gaia te vaheu na laga ge ku nia vana na baghe halo.

⁴⁰Ighoe to nera ge ra ririu mara sama; inau tu taghalaghinira tara niu sika.

⁴¹Gaira tara holoa ahei ge ke hangara. Hauva me taho ahei ke vavolara. Gaira tara ngangaraha vania Lord, hauva me mua bosa tughu vanira.

⁴²Nau tu pilepilera vaghaa na pughu ni pari te lovolaghinia na ghuri. Inau tu halara va tana beti vaghaa na lololo.

⁴³Ighoe to neu ge u lagavulera tara huru tabou, ighoe to viliu ge ku vunaghidira na lei kema; na vure tu mua ghilalara tara vuha mai kabu i sarana nigua na maana mara lutu vaniu.