Buka Linge 16:1-9

¹Ko righitaoniu tana lei totobo dika ke bei kaleu, ghe God, inau tu varava itamua ge ko pilupungisiu.

²Inau tu bosa vania va Lord, “Ighoe nigua na God! Na lei totobo uto tu loghoi tara butu mai tamua.”

³Gaira tara kabu tabu tana maramana itadira te ghanaa nigua na ghanaghana ge ku kabu kolura!

⁴Gaira tara mina samataonighi na lei God keha ke vonughira na dikalio. Inau ku mua tangomana ge ku hahanga ta didira na sukaghi, mu ku mua tangomana na kikinima vaniadira.

⁵Lord, itamua heghemu vamua na lei totobo tu loghoi, maia nigua na seu ni vauto. Mo righitaonighi nigua na lei totobo.

⁶Na pari to vaheu te togotogogha. Ivei vaho te vaghaa na utona nigua na lologho iga.

⁷Inau ku holoutoa Lord na pukuna te uhuliu mi tana bongi ghua na tobagu te taraiu.

⁸Inau tu ghilalaa a Lord te kabu haia itagua. Ku tangomana na aleale, na pukuna gaia tana lilighigu.

⁹Ku mua nia hava na tobagu te vonughia na togotogo mana rivurivu, mana mangagu te nia ghu na holohabaana. Na huligu te aheahe tana mabo.