Buka Linge 147:7-20

⁷Linge vania Lord nia na holouto, Tangi vania dida na God nia na ukalele.

⁸Te talura na lei lovu tana parako, me ke vetena mai na uha vania na pari mamaha, me ke gonia na buburu te totolo tana lei ghotu.

⁹Te nia vetena mai na vanga vania na lei maumanu, ma vania na lei maumanu pile tana bona tara tangi.

¹⁰A Lord te mua ghanaghana mava na lagana na horse, pe liona na lagana na tuana na mane.

¹¹Gaia te togotogo nia na lei vure tara nia kikinima, gaira tara pitudila nina dolo te kasila haia.

¹²Holoutoa Lord, Ighoe Jerusalem. Holoutoa God, na ghotu i Zion.

¹³Gaia te lagalagai na mataula ni Jerusalem, me vautora na vure ilokana na piluna,

¹⁴te hea na mabo vanira na vure tana komu eni, me hera na puku ni vanga uto.

¹⁵A Lord te bosa papara vania na maramana, ma nina bosa te tona minamina,

¹⁶Keri ke na snow te horu me saroa na pari, vagha na lovu te saroa na ghotu sule. Te vetena ghua na ice, mete soni keha kolili vagha tara soni kehara na ravu.

¹⁷Te peta horua nina uha te ice pile, te vagha na lei gari tara peta na vatu. Ahei te kabu pungisia nina maana te gonia vagha eni?

¹⁸A Lord te vetena nina bosa, mara tughu tana beti, te vetena na ghuri, mana beti te sogha horu.

¹⁹Gaia te bosa tatea nina bosa vania na kemana Jacob, mana nina vetena mana bosa papara vania rana Israel.

²⁰Te mua tatea vagha eni vania siki na kema ghua, ma gaira tara mua ghilala nina vetena. Holoutoa A Lord!