Buka Linge 139:5-24

⁵Ighau ko ide, mo ko tumuriu, ko haua mai na limamu vuvunga ni ulugu, mo ko vautou.

⁶Na vata ni manaha eni te sule vuleu inau, e sule vulea nigua na manaha ni ghilala.

⁷Inau ku mua tangomana na ghogho keha sania nimua na tarunga, mu ku mua tughuru polo ghua tana matamu.

⁸Ke vagha ku dato i kokou ke, mi ghoe so iga, mu ku horu i Betidalo ke, mi ghoe so iga,

⁹Ke vagha ku nia lovo na ghata te labota, mu ku ghahau levu na na horara,

¹⁰Na limamu ke hagalo sodou so iga, me ke patupatu.

¹¹Ku nongia na pungi ge ke kuvihiu, pana marara te talighutiu ge ke liliu ni pungi,

¹²Mi lokana na pungi loloho, ku mua tangomana na polo tana matamu. Na bongi mana dani sakai na vata vamua i tamua. Na bongi te marara vagha so na dani.

¹³Ighoe to gonighi na lei ula vola soko lokana na huligu, mo pasu kolu lokana na kutuna na tinagu.

¹⁴Na malei limamu te haeharegha, me vatei mamaromangana, mu ghilala uto tua. Holoutogho ighoe to goniu.

¹⁵Ighoe to mata reireiu tana bona tu vuha lokana na pungi, to talu kolu heghegu ga tana keigu.

¹⁶Mo ghilalai na lei bongigu, naghona ge u sivuragha, na lei bongi ni volagu soko na gegereni te ghahai tua lokana nimua na buka.

¹⁷Na lei matakuni ni mata tu gonidila sokoi tua, ge padi a sakai na dani,

¹⁸mi tana bona tu rarai mai tana puipungi, ighoe so itagua.

¹⁹Ghe God, ke vagha ko taghalaghiniana na lei tinoni dika ke, ma kara righihoru keha ghua na lei tinoni labu tabo/haga labu mate.

²⁰Gaira na ghamua levunimate, tana bona tara bosa taboa na ahamu, tara bosa dikalagho haia.

²¹Lord, ku nia sika mughua ra hei tara nia sika ighoe. Mu ku nia sika rahei tara hughuhughu kolugho.

²²Eo, ku nira sika haliu tua, na pukuna na ghamua na kana, gaira ghagua na levunimate.

²³Ghe God, kene taoniu, mo righia utoa na lokagu, ko tabotabou mo ko ghilala na lokana na liogu.

²⁴Tuhu kalei mai itagua na hava te pungisigho, mo ko uhuliu maemaneu gatu tara vola kasila.