Buk Song 99:3-9

³Olgeta manmeri i mas tingting long em i nambawan king na em i gat biknem. Na ol i mas litimapim biknem bilong en. Em God bilong mekim gutpela na stretpela pasin olgeta.

⁴Strongpela king, yu save laikim tumas stretpela pasin tasol. Yu bin givim mipela ol manmeri bilong Israel stretpela na gutpela pasin, na mipela i bihainim. Na yu mekim mipela i skelim stret pasin bilong ol arapela manmeri.

⁵Yupela i mas litimapim nem bilong Bikpela, em i God bilong yumi. Yupela go klostu na lotu long em. Em God bilong mekim gutpela na stretpela pasin olgeta.

⁶Moses wantaim Aron, tupela i bin i stap pris bilong Bikpela, na Samuel tu em i wanpela bilong ol lain i bin lotu long God. Ol i bin prea long Bikpela na em i harim beten bilong ol.

⁷Em i stap long bikpela klaut na givim lo long ol. Na ol i bihainim olgeta lo God i givim long ol.

⁸God, Bikpela bilong mipela, yu bin harim prea bilong ol manmeri bilong yu. Yu bin soim ol, yu yet yu God na yu save rausim sin bilong ol, tasol yu mekim save long ol bilong bekim rong bilong ol.

⁹Litimapim nem bilong God, Bikpela bilong yumi, na lotu long em long maunten bilong en. God, Bikpela bilong yumi, em God bilong mekim gutpela na stretpela pasin olgeta.