Buk Song 96:4-12

⁴Bikpela em i namba wan tru na yumi mas litimapim nem bilong em moa yet. Ol arapela god i no olsem Bikpela. Olsem na yumi mas aninit long Bikpela.

⁵Olgeta god bilong ol arapela lain manmeri, ol i giaman god tasol. Tasol Bikpela i bin wokim skai.

⁶Bikpela i stap long haus bilong en na em i gat biknem na i stap king. Na em i as bilong olgeta strong na bilong olgeta naispela samting.

⁷Yupela olgeta lain manmeri, yupela i mas amamas long Bikpela. Yupela i mas amamas long biknem na strong bilong en.

⁸Bikpela em i namba wan, olsem na yupela i mas litimapim biknem bilong en. Yupela i mas bringim ofa na go long haus bilong em.

⁹Pasin bilong Bikpela i gutpela tumas na i stretpela olgeta, na dispela pasin i olsem gutpela bilas bilong em. Olsem na yupela i mas tingim dispela na lotuim em. Yupela olgeta manmeri bilong graun, yupela i mas pret long em na guria.

¹⁰Yupela i mas tokim ol lain manmeri olsem, “Bikpela i stap king. Em i bin mekim graun i stap strong na graun i no inap surik. Bihain bai Bikpela i mekim kot na long stretpela pasin bilong en em bai i skelim pasin bilong olgeta lain manmeri.”

¹¹Graun na skai, yupela i mas amamas. Solwara, yu mas amamas na mekim bikpela nois. Na yupela olgeta samting i stap insait long solwara, yupela tu i mas amamas.

¹²Yupela ol gaden, na yupela ol samting i stap long ol gaden, yupela olgeta i mas amamas. Bikpela bai i kam. Em bai i kam na i stap king na bosim olgeta hap bilong graun. Na long dispela taim olgeta diwai bilong bikbus bai i mekim song bilong amamas. Long stretpela pasin bilong en Bikpela bai i bosim olgeta lain manmeri. Na long tok tru bilong en em bai i skelim pasin bilong ol.