Buk Song 91:7-14

⁷Sapos 1,000 man i dai klostu long yu, na 10,000 i dai long han sut bilong yu, maski, samting nogut i no ken i kam klostu long yu.

⁸Bai yu yet i lukim God i bekim pasin nogut ol man nogut i bin mekim.

⁹Yu save go long God na hait long ol samting nogut, na God Antap Tru em i wasman tru bilong yu.

¹⁰Olsem na samting nogut i no inap kamap long yu. Na bikpela sik i no inap i go klostu long haus bilong yu.

¹¹Bikpela bai i givim wok long ol ensel bilong was long yu long olgeta wokabaut bilong yu.

¹²Na bai ol i karim yu long han bilong ol, nogut wanpela ston i sutim lek bilong yu.

¹³Bai yu krungutim laion na snek na yangpela laion na bikpela snek nogut tu.

¹⁴God i tok olsem, “Bai mi kisim bek ol man i laikim mi tru, na bai mi lukautim gut ol man i save tru long mi.