Buk Song 90:1-15

¹Dispela song em i beten bilong Moses, dispela man bilong God. Bikpela, yu olsem haus tru bilong mipela. Ol tumbuna i bin i stap long yu, na nau mipela tu i stap olsem.

²Oltaim oltaim yu stap God, long bipo na long bihain tu. Olgeta maunten i no kamap yet, na yu no bin wokim olgeta samting bilong graun yet, tasol yu stap.

³Yu save mekim ol manmeri i dai na ol i kamap graun gen. Na yu tok olsem, “Yupela manmeri bilong graun, yupela i mas i dai na tanim graun gen.”

⁴Long tingting bilong yu 1,000 yia i olsem wanpela de tasol, na dispela taim i go pinis kwiktaim tumas, olsem asde tasol. Na em i olsem sotpela taim ol soldia i save stap sentri long nait.

⁵Yu save rausim ol man, olsem wara i tait na i kisim ol man na ol i dai. Ol i stap sotpela taim olsem driman tasol. Ol i olsem gras i save kamap nupela long moningtaim,

⁶na i kamap bikpela na plaua i kamap. Tasol long apinun em i drai olgeta.

⁷Yu gat kros long mipela, olsem na yu save bagarapim mipela. Yu belhat long mipela, olsem na mipela i pret nogut tru.

⁸Yu save lukim olgeta pasin nogut bilong mipela. Na olgeta sin mipela i hait na mekim, em yu putim ples klia na yu lukim pinis.

⁹Kros bilong yu i save sotim taim bilong mipela i stap long graun. Tru tumas, taim bilong mipela i save pinis kwik, olsem mipela i pulim win wanpela taim tasol.

¹⁰Mipela i save stap inap 70 yia tasol. Na sapos mipela i gat strong, mipela i ken i stap inap 80 yia. Tasol long dispela olgeta yia mipela i stap, mipela i save hatwok na painim hevi tasol. Dispela olgeta yia i pinis kwiktaim, na mipela tu i go pinis.

¹¹Husat i save gut long bikpela strong bilong kros bilong yu? Na husat i save long bikpela pret i kamap long ol manmeri taim yu kros long ol?

¹²Yu skulim mipela gut bai mipela i ken save olsem mipela i no inap i stap longpela taim long graun. Olsem na bai mipela i gat gutpela save tru.

¹³Bikpela, hamas taim yet bai belhat bilong yu i stap? Yu mas sori long mipela ol wokman bilong yu.

¹⁴Yu save laikim mipela oltaim, na dispela i ken pulapim mipela long olgeta moningtaim. Olsem na long olgeta taim mipela i stap laip mipela i ken amamas na belgut.

¹⁵Pastaim yu givim hevi long mipela. Tasol nau yu ken mekim mipela i amamas bilong inapim ol dispela taim mipela i karim hevi. Planti yia mipela i stap nogut, olsem na nau yu ken givim amamas long mipela inap olsem olgeta yia nogut.