Buk Song 84:7-12

⁷Ol dispela man i wokabaut na i kamap strong. Bai ol i go kamap long Saion, na lukim God i stap. Em i God i antap long olgeta giaman god.

⁸God, Bikpela I Gat Olgeta Strong, harim prea bilong mi. Yu God bilong Jekop, putim gut yau na harim tok bilong mi.

⁹Lukim king bilong mipela. Em i save banisim mipela na lukautim gut mipela, olsem hap plang i banisim soldia long taim bilong pait. Bikpela, yu yet yu bin makim em na em i stap king, na yu ken mekim gut tru long em.

¹⁰Sapos mi stap wanpela de tasol long haus bilong yu, em i winim tru 1,000 de long narapela ples. Mi laikim tumas long sanap long dua bilong haus bilong God bilong mi. Tasol mi no laik i stap long haus bilong ol man nogut.

¹¹Bikpela em i wasman bilong yumi na em i lait bilong yumi. Em i save marimari long yumi na givim biknem long yumi. Em i no save pasim wanpela gutpela samting long ol manmeri i save wokabaut stret.

¹²Bikpela I Gat Olgeta Strong, ol manmeri i save bilip long yu, ol i ken amamas oltaim.