Buk Song 83:3-17

³Ol i hait na pasim tok bilong mekim nogut long ol manmeri bilong yu. Yu save lukautim gut ol dispela manmeri, tasol ol birua i kibung bilong bagarapim ol.

⁴Ol i tok olsem, “Goan, yumi pinisim tru ol Israel, bai ol manmeri i no inap tingting moa long ol.”

⁵Ol i wanbel long mekim dispela samting. Na ol i poroman wantaim bilong daunim yu.

⁶Ol dispela lain i laik mekim olsem, em ol Idom na ol Ismael na ol Moap na ol Hakri

⁷na ol Gebal na ol Amon na ol Amalek. Ol dispela lain i stap long hap bilong kantri Filistia na taun Tair.

⁸Ol Siria tu i bung wantaim ol. Dispela strongpela lain i helpim ol lain tumbuna bilong Lot.

⁹Yu mas mekim wankain pasin long ol, olsem bipo yu bin mekim long ol Midian, na long Sisera na Jabin long bikpela wara Kison.

¹⁰Long dispela taim yu bagarapim ol long taun Endor na bodi bilong ol i stap nabaut long graun na i sting.

¹¹Yu mas mekim save long ol kepten bilong ami bilong ol, olsem bipo yu bin mekim long Orep na Sep. Daunim ol hetman bilong ol, olsem yu bin mekim long Seba na Salmuna.

¹²Ol dispela man i bin tok, “Yumi mas kisim dispela graun bilong God, bai em i kamap graun bilong yumi tasol.”

¹³God bilong mi, yu ken rausim ol i go nabaut olsem das bilong graun. Rausim ol, olsem win i rausim skin rais i go nabaut.

¹⁴Paia i save kukim kunai, na maunten i gat kunai i save paia bikpela.

¹⁵Olsem tasol yu mas salim bikpela ren na ranim ol dispela lain bai ol i ranawe. Na yu mas salim strongpela win tru i go long ol bai ol i pret.

¹⁶Bikpela, daunim ol tru na bai ol i sem nogut na bai ol i laik bihainim yu.

¹⁷Mi laik bai yu winim ol na bai ol i pret nogut oltaim. Mekim ol i sem na kilim ol i dai.