Buk Song 81:3-15

³Winim biugel long bikpela de bilong lotu long taim bilong nupela mun na long taim mun i bikpela pinis.

⁴Dispela em i lo bilong yumi ol Israel. God bilong Jekop i givim dispela lo long yumi.

⁵Taim bipo God i go pait long ol Isip, em i givim dispela lo long yumi Israel.

⁶Mi harim nek bilong wanpela man na mi no save em i nek bilong husat. Em i tok olsem, “Mi rausim pinis olgeta hevipela samting i stap long sol bilong yupela. Na mi larim yupela i putim ol basket bilong wok i go daun long graun.

⁷Taim yupela i gat bikpela hevi na yupela i singaut long mi, mi bin helpim yupela na yupela i stap gut. Mi stap long ples hait bilong mi namel long klaut i pairap na mi harim prea bilong yupela. Bipo yupela i stap long ol hul wara bilong Meriba na mi traim yupela.

⁸“Ol manmeri bilong mi, mi laik givim strongpela tok long yupela. Ol Israel, mi laikim tumas long yupela i harim tok bilong mi.

⁹Yupela i no ken bihainim ol giaman god bilong ol arapela lain. Na yupela i no ken lotu long narapela god. Yupela i mas lotu long mi wanpela tasol.

¹⁰Mi tasol mi Bikpela, mi God bilong yupela. Mi yet mi bin kisim yupela long Isip na bringim yupela i kam. Yupela opim maus na bai mi putim kaikai long maus bilong yupela.

¹¹“Tasol ol manmeri bilong mi i no laik harim tok bilong mi. Tru tumas, ol Israel i no laik bihainim tok bilong mi.

¹²Olsem na mi larim ol i bihainim pasin bikhet bilong ol, na ol i mekim ol samting long laik bilong ol.

¹³Mi laikim tumas bai ol manmeri bilong mi ol i harim tok bilong mi. Na mi laik bai ol Israel i bihainim laik bilong mi oltaim.

¹⁴Sapos ol i mekim olsem, orait kwiktaim bai mi daunim ol birua bilong ol. Bai mi pait long ol birua na winim ol tru.

¹⁵Ol manmeri i no save laikim mi, bai ol i pret nogut na brukim skru long mi. Na oltaim bai mi mekim save long ol.