Buk Song 7:7-17

⁷Yu mas sindaun long sia king bilong yu long heven na tokim olgeta lain manmeri long kam bung klostu long yu.

⁸Bikpela, yu save skelim pasin bilong olgeta lain manmeri. Olsem na yu ken helpim mi long winim kot, long wanem, mi bin mekim ol gutpela stretpela na pasin tasol.

⁹God, yu stretpela olgeta. Yu save skelim tingting na bel bilong olgeta man. Orait yu mas pinisim tru ol pasin nogut bilong ol man nogut. Na yu ken helpim ol stretpela man bai ol i sanap strong.

¹⁰God em i wasman bilong mi. Em i save helpim ol man i bihainim tok bilong em.

¹¹God em i gutpela jas na em i save mekim stretpela kot. Oltaim em i save daunim ol man bilong mekim pasin nogut.

¹²Sapos ol man nogut i no tanim bel, bai God i sapim bainat bilong en. Na bai em i taitim banara na i redi long pait.

¹³Em i makim ol long spia i gat paia. Em i redim pinis ol spia samting bilong kilim ol dispela man i dai.

¹⁴Lukim man nogut. Em i pasim tingting pinis long mekim ol pasin nogut. Em i redi long mekim olkain trabel na em i save giaman oltaim.

¹⁵Em i wokim bikpela hul long graun bilong holimpas narapela man. Tasol em yet bai i pundaun long dispela hul em i bin wokim.

¹⁶Olsem tasol rong em i mekim bai i karamapim em yet. Na kros pait em i laik mekim long ol arapela man bai i tanim na bagarapim em yet.

¹⁷God em i stretpela olgeta, na mi tenkyu long em. Bai mi singim song long God Antap Tru bilong litimapim nem bilong em.