Buk Song 7:3-13

³God, Bikpela bilong mi, sapos mi gat asua long ol pasin nogut, sapos mi bin mekim nogut long narapela man,

⁴sapos mi bin trikim pren bilong mi, na sutim tok nating long en, na sapos mi bin mekim nogut nating long birua bilong mi,

⁵orait yu ken larim ol birua i ranim mi na holimpas mi. Ol i ken krungutim mi na bagarapim mi olgeta na larim bodi bilong mi i slip i stap nating long graun.

⁶God, mi laik bai yu ken kirap. Yu ken belhat long ol birua i pait strong moa long mi na yu ken mekim save long ol. God bilong mi, yu save laikim stretpela pasin tasol, olsem na yu mas kirap na helpim mi.

⁷Yu mas sindaun long sia king bilong yu long heven na tokim olgeta lain manmeri long kam bung klostu long yu.

⁸Bikpela, yu save skelim pasin bilong olgeta lain manmeri. Olsem na yu ken helpim mi long winim kot, long wanem, mi bin mekim ol gutpela stretpela na pasin tasol.

⁹God, yu stretpela olgeta. Yu save skelim tingting na bel bilong olgeta man. Orait yu mas pinisim tru ol pasin nogut bilong ol man nogut. Na yu ken helpim ol stretpela man bai ol i sanap strong.

¹⁰God em i wasman bilong mi. Em i save helpim ol man i bihainim tok bilong em.

¹¹God em i gutpela jas na em i save mekim stretpela kot. Oltaim em i save daunim ol man bilong mekim pasin nogut.

¹²Sapos ol man nogut i no tanim bel, bai God i sapim bainat bilong en. Na bai em i taitim banara na i redi long pait.

¹³Em i makim ol long spia i gat paia. Em i redim pinis ol spia samting bilong kilim ol dispela man i dai.